УДЭТ-ын уран бүтээлчид энэ есдүгээр сарын 17, 18-нд Южин О’Нилийн “Хайлаас модны доор чамайг хүлээнэ” жүжгээ тоглох гэж байна. Жүжгийн гол дүрүүд буюу Эфрайм Кэботод Гавьяат жүжигчин М.Түвшинхүү, Абби Патнамд О.Долгор, Эбин Кэботод Т.Сэргэлэн, Симеон Кэботод Б.Баттогтох, Питер Кэботод Н.Мөнх-Эрдэнэ тоглоно.
Эл зохиолыг Нобелийн шагналт, Америкийн жүжгийн зохиолч Южин О’Нил “Desire under the elms” нэртэйгээр 1924 онд бичсэн байдаг. Түүний зохиолуудад Грекийн эмгэнэлт жүжгийн хэв маяг, америк мөрөөдөл ба түүнийг тойрсон материализм, анги хоорондын ялгаа гүнзгий ажиглагддаг.
“Хайлаас модны доор чамайг хүлээнэ” бол энэ бүгдийг шингээсэн, хөндөх санаа, агуулга тун өргөн бүхий бүтээл юм.
Анх 1996 онд УДЭТ-ын тайзнаа “Тамын дурлал” нэртэйгээр үзэгчдэд хүрч байсан жүжгийг энэ удаа “Хайлаас модны доор чамайг хүлээнэ” нэртэйгээр толилуулж буй нь энэ бөгөөд жүжгийн ерөнхий найруулагчаар Төрийн шагналт, Урлагийн гавьяат зүтгэлтэн Н.Наранбаатар, ерөнхий зураачаар Урлагийн гавьяат зүтгэлтэн Т.Ганхуяг, бүжиг, хөдөлгөөний найруулагчаар Г.Ган-Очир ажилласан.
