“Боролдой хүү минь яваарай, болзсон цагтаа ирээрэй, бүлтгэр үр минь бүүвэй, бүүвэй” гэдэг дууг мэдэхгүй хүмүүс цөөн биз. Оройн 08.00 цагт хүүхэд бүрийг дэлгэцийн өмнө цуглуулдаг байсан “Боролдойн цаг” хүүхэлдэйн киног “Юнивишн” компани 4K нягтаршил, stereo дуутай болгон сэргээн засварлаж олон нийтэд хүргэлээ.
Өнгөрсөн амралтын өдрүүдэд болсон “Animo Festival”-д “Юнивишн” компани ирэх онд эхлүүлэхээр төлөвлөж буй “Mongol Animation 4K” төслөө танилцуулсан юм. Төслийн эхлэл болгож Монголын хүүхэлдэйн киноны сонгодог бүтээл “Боролдойн цаг”-ийн сэргээн засварласан 4K хувилбарыг олон нийтэд хүргэсэн нь Монголын анимейшний салбарт чухал алхам болж байна.
Тус хүүхэлдэйн киног бүтээсэн зохиолч, найруулагч, зураглаач С.Мягмар фестивальд хүрэлцэн ирсэн бөгөөд ярилцлагадаа “Энэхүү бүтээл нь Монголын анимейшний эхлэл, мөн ирээдүй хойч үедээ өвлүүлэх соёлын үнэт өв билээ. Үүнийг орчин үеийн технологиор сэргээж, дараа дараагийн үедээ үлдээх дижитал хувилбар болгож буйдаа баяртай байна” гэж хэлжээ.
“Юнивишн” компани “Mongol Animation 4K” төслөөрөө Монгол хүүхдийн дурсамжит бүтээлүүдийг цаг үеийн дэвшилтэт технологитой хослуулан шинэ үеийнхэндээ хүргэхийг зорьж байна. Ингэснээр хүүхэд багачууд аав, ээжийнхээ бага насыг хамт бүтээлцсэн сонгодог хүүхэлдэйн киног хамтдаа дахин үзэх боломжтой болох юм.
“Юнивишн” компанийн “Mongol Animation 4K” төслийн хүрээнд сэргээсэн хүүхэлдэйн кинонууд тун удахгүй бидний дэлгэцэд….
