“Өнгөөр урласан нөхөрлөл” хүүхдийн дүрслэх урлаг, гар урлалын бүтээлийн үзэсгэлэн өчигдөр /2025.09.30/ Монголын хүүхдийн урлан бүтээх төв (МХУБТ)-ийн “Орд” арт галерейд нээлтээ хийлээ.
Монгол Улс, Бүгд Найрамдах Хятад Ард Улс (БНХАУ) хооронд дипломат харилцаа тогтоосны 76 жилийн ойг тохиолдуулан БНХАУ-аас Монгол Улсад суугаа Элчин сайдын яам, МХУБТ хамтран зохион байгуулж буй тус үзэсгэлэнд уран зураг, гар урлал, монгол уран бичлэг, хятад ханз уран бичлэг гэсэн дөрвөн төрөлд 6-18 насны хүүхдүүд бүтээлээ ирүүлжээ.
Монгол, Хятадын нөхөрлөл, өв соёлыг хүүхдийн уран бүтээлээр дамжуулан олон нийтэд хүргэх зорилготой уг үзэсгэлэнд БНХАУ-ын Өвөр Монголын Өөртөө Засах Орон (ӨМӨЗО)-оос хүүхдүүд бүтээлээ илгээсэн байна.
Нээлтэд БНХАУ-аас Монгол Улсад суугаа Онц бөгөөд Бүрэн Эрхт Элчин сайд Шэнь Миньжуань, МХУБТ-ийн захирал Д.Уранбилэг тэргүүтэй зочид оролцлоо.
Нийт 1,400 гаруй бүтээлээс шилдгийн шилдгээр тодорч, гранпри шагналыг 31 дүгээр сургуулийн аравдугаар ангийн сурагч Э.Пүрэвжаргал хүртлээ. Тэрбээр гар урлалын төрлийн сүрлэн наамлаар гранпри шагнал авч буй анхны оролцогч болсныг зохион байгуулагчид онцоллоо.
Уг үзэсгэлэнд ирсэн бүтээлүүд тус төвийн “Орд” арт галерейд 14 хоног дэлгэгдэх аж.
