Комедиан, жүжигчин, зохиолч Элайн Ван дер Велдэгийн үүсгэн байгуулсан “Xicoia” AI студи Тилли Норвуд хэмээх AI жүжигчнийг бүтээн “AI Commissioner” хэмээх инээдмийн бүтээлээр дамжуулж олон нийтэд хүргэжээ.
View this profile on Instagram
Тэгвэл Цюрихийн кино наадмын хүрээнд танилцуулсэн эл жүжигчнийг Холливуудын жүжигчид тун таагүй хүлээн авч байна.
Тухайлбал, жүжигчин Мелисса Баррера өөрийн инстаграм сторидоо “Хэрэв ийм жүжигчнийг төлөөлөх агентлаг байвал тэдний бүх жүжигчид агентлагаа орхих хэрэгтэй. Энэ бол үнэхээр жигшүүртэй зүйл” хэмээн шүүмжилсэн бол “Matilda” киноны од Мара Уилсон “Түүний царайг бүтээхэд ашигласан олон зуун бодит охид байхад яагаад тэдний аль нэгийг нь ажилд аваагүй юм бэ” хэмээн байр сууриа илэрхийлжээ. Мөн жүжигчин Эмили Блант уг мэдээллийг сонсоод “Аймшигтай байна. Үнэхээр сэтгэл түгшээж байна. Бид хүн хоорондын холбоогоо алдаж байна. Агентлагууд аа, ийм зүйл бүү хий” хэмээн сэтгэгдлээ илэрхийлжээ.
Харин эл AI жүжигчнийг бүтээгч Элайн Ван дер Велдэ өөрийн AI бүтээл болох Тилли Норвудыг хүнийг орлох зорилготой биш, харин уран бүтээлийн нэг хэлбэр гэж тодорхойлж, тайлбар нийтлэсэн байна. Түүнчлэн “AI бол хүмүүсийг орлох хэрэгсэл биш, харин шинэ төрлийн бийр. Анимейшн, хүүхэлдэй, CGI шиг шинэ боломж нээх урлагийн хэрэгсэл юм. Бодит жүжигчний ур чадвар, мэдрэмжийг хиймэл оюун хэзээ ч орлож чадахгүй” хэмээн мэдэгджээ.
