“Симпсоныхон” кино нь анхны бүтээлээсээ хойш 20 жилийн дараа үргэлжлэлээрээ эргэн ирэх гэж буйг “20th Century Studios” болон “Disney” компани даваа гараг /2925.09.29/-т албан ёсоор зарлалаа.
“Fox” кино компанийн олон жил үргэлжилсэн анимейшн цуврал дээр үндэслэсэн уг кино нь Гомер, Марж болон тэдний гурван хүүхэд Барт, Лиза, Мэгги нарын амьдралыг харуулдаг. Одоогоор нэр нь тодорхойгүй байгаа уг кино 2027 оны долдугаар сарын 23-нд нээлтээ хийхээр товлогджээ.
2007 онд гарсан эхний кинонд Гомер санамсаргүйгээр Спрингфилдийн усан хангамжийг бохирдуулж, улмаар аварга шилэн бөмбөлөгт тусгаарлагдсан гэр бүл, хотынхоо төлөө тэмцэж буй тухай өгүүлсэн.
Шинэ киноны постерыг нийгмийн сүлжээнд “Хомер эргэн ирлээ” гэсэн тайлбартайгаар нийтэлжээ. Кино сонирхогчид уг мэдээний дор сэтгэгдлээ үлдээж, шоуны нээлтийн кадруудыг шоглон, Бартыг самбар дээр “Би дараагийн киног хийхээр 20 жил хүлээхгүй” гэж бичиж буйгаар зурсан байв.
“Симпсоныхон” анх 1987 онд “The Tracey Ullman Show”-д богино хэмжээний хэлбэрээр үзэгчдэд хүрч, хоёр жилийн дараа өөрийн гэсэн цувралтай болсон. Мэтт Гроунингийн бүтээл энэхүү цуврал өнөөг хүртэл 37 улирал гарсан бөгөөд саяхан 40 дэх улирал хүртэл (2028/2029 онд цацагдана) сунгагдсан байна.
2007 онд гарсан бүрэн хэмжээний киног Дэвид Силверман найруулж дэлхий даяар ойролцоогоор 536 сая ам.долларын орлого олжээ. Дараагийн ангийн тухай олон жилийн турш цуурхал гарч байсан ч албан ёсоор батлагдаагүй байв.
