Хөвсгөл аймаг БНСУ-ын Дэжон хотын Со дүүрэгтэй 2011 онд найрсаг харилцаа, хамтын ажиллагааг эхлүүлэн боловсрол, эрүүл мэнд, соёл урлаг, аялал жуулчлалын чиглэлээр хамтран ажиллаж байна.
Тус аймгийн ИТХ-ын дарга Д.Пүрэвдорж уран бүтээлчдийн хамт Дэжон хотын Со дүүрэгт болсон “Healing Art” наадамд оролцож Монгол өв соёлоо сурталчлан олон нийтэд хүргэлээ.
Энэ үеэр Монгол бүжиг, дуу, морин хуурын тоглолтыг олон удаа дахиулж байлаа.
Хамтын ажиллагааны хүрээнд боловсролын салбарт сурагч солилцооны хөтөлбөр хэрэгжүүлж, хүүхдүүдийн хэл, соёлын мэдлэг дээшилсэн бол соёл, урлагийн салбарт “Healing Art” наадам болон театрын тоглолтуудыг зохион байгуулснаар хоёр орны иргэдийн соёлын харилцаа өргөжсөн байна.
Мөн эрүүл мэндийн салбарт хоёр орны эмч нарын хамтын ажиллагааны хүрээнд 1700 гаруй иргэн эмчилгээ, үзлэг үйлчилгээ авч, эм, эмнэлгийн хэрэгсэл нийлүүлж, сургалтын хөтөлбөрүүд хэрэгжжээ.
Цаашид хоёр бүс нутгийн найрсаг харилцааг сэргээж, цаашид хамтын ажиллагааг олон салбарт өргөжүүлэх зорилго тавин ажиллаж байна.
