“Хувьсал” продакшны дэлгэцийн найм дахь уран бүтээл “Хувь заяа” уран сайхны кино 24 дэх удаагийн Сан Диегогийн олон улсын кино наадамд албан ёсоор сонгогдон өрсөлдөж, шилдгээр шалгарчээ.
Тус кино наадам 2025 оны аравдугаар сарын 15-19-ний хооронд АНУ-ын Сан Диего хотноо зохион байгуулагдсан бөгөөд 29 орны уран бүтээлчдийг хамарсан дэлхийн хэмжээний фестивалиудын нэг юм.
“Хувь заяа” киноны хувьд 2022 онд Өмнөговь аймгийн Хүрмэн сумын Жанжин багийн нутаг дэвсгэрт зураг авалтыг нь хийж гүйцэтгэсэн бөгөөд “Эмэгтэй хүн бүрийн дотор эх хүний сэтгэл оршиж байдаг” гэдгийг харуулахыг зорьжээ.
“Хувь заяа” киноны найруулагчаар Г.Бямбасүрэн ажиллаж, гол дүрд Ардын жүжигчин, Хөдөлмөрийн баатар Д.Мэндбаяр, Гавьяат жүжигчин П.Эрдэнэзаан, У.Уранчимэг залуу жүжигчин У.Нартай, туслах дүрд Соёлын тэргүүний ажилтан Д.Пүрэвсүрэн, Н.Бадарч, Б.Баярмаа нар тус тус дүрийг бүтээсэн байна.
