Лос Анжелес хот дахь нэгэн кино театр Йоргос Лантимосын шинэ бүтээлийг үнэгүй үзэх онцгой арга хэмжээ зохион байгуулж байна.
Учир нь үзэгчид киног үзэхийн тулд театрын үүдэнд үсээ хусуулах эсвээс халзан байх шаардлагатай.
Тус санаачилга нь Эмма Стоуны “Bugonia” кинонд бүтээсэн дүрд хүндэтгэл үзүүлж буй хэрэг аж. Тэрбээр эмийн компанийн даргын дүрд тоглосон байна. Харин Жесси Племонс түүнд өш санаж, барьцаалдаг ажилтны дүрийг бүтээжээ. Гэвч энэ бол энгийн нэгэн өшөө авалт бус гэдгийг киноноос үзэх боломжтой. Учир нь гол дүр маань бусдын үсийг хусдаг хуйвалдааны онолчдын бүлэгт баригддаг. Шүүмжлэгчид тус бүтээлийг цэвэр хийсвэр сэтгэлгээнийх атлаа донтуулам үйл явдалтай, үнэхээр гаж болов хоржооноор дүүрэн, төгсгөлийн гэнэтийн үйл явдал нь жинхэнэ оюуны санааны дэлбэрэлт хэмээн дүгнэжээ.
“Та халзан уу, эсвэл үсээ хусуулахад бэлэн үү?” хэмээн арга хэмжээний урилга дээр бичжээ.
Хэрэв кино үнэгүй үзэх болон үсээ үнэгүй хусуулахыг хүссэн хэн ч тус театрын үүдэнд оройн 18:00 цагаас хойш очиж болно. Театрын зүгээс “Энэ бол бодит. Тийм ээ, үзүүлбэрийн хэсгийн зургийг авах болно” гэж мэдэгджээ. Оролцогчид 18 наснаас дээш байх ба суудлын тоо хязгаартай тул урьдчилан бүртгүүлэх шаардлагатай.
АНУ-ын Кино холбоо “Bugonia” бүтээлд ““R” ангилал өгчээ. Лантимос ба Стоуны хамтын дөрөв дэх уран бүтээл болох “Bugonia” нь 2018 оны “The Favourite”, 2023 оны “Poor Things”, 2024 оны “Kinds of Kindness” зэрэг кинонуудын дараа бүтээгдсэн бөгөөд кино шүүмжлэгчдээс өндөр үнэлгээ аваад байгаа билээ.
Эмма Стоун “Vogue” сэтгүүлд өгсөн ярилцлагадаа үсээ хусуулсан үеийн мэдрэмжээ хуваалцахдаа “Дэлхий дээрх хамгийн гайхалтай зүйл” хэмээн тодорхойлжээ. Мөнхүү “Үсээ хуссаны дараа анх удаа шүршүүрт орох… Бурхан минь, үнэхээр гайхалтай!” хэмээсэн байна.
Тэрбээр мөн өөрийн үсийг хусах шийдвэр гаргаснаа 2008 онд хөхний хорт хавдрын эмчилгээний улмаас үсээ алдсан ээжийнхээ туршлагатай харьцуулж, “Ээж маань жинхэнэ зориг гаргасан. Харин би бол үсээ л хусуулсан” гэжээ.
“Bugonia” нь энэ сарын 24-нөөс АНУ-д хязгаартай гарч эхлэх бөгөөд 31-нээс өргөн дэлгэцийн нээлт хийх юм. Харин Австралид энэ сарын 30-нд, Их Британид мөн 31-нд нээлтээ хийх билээ.
