Шведийн жүжигчин, хөгжимчин Бьёрн Андресен 70 насандаа таалал төгслөө.
Бьёрн 1955 онд Стокхольм хотод төрсөн. 10 настайд нь ээж нь амиа хорлож, тэрээр эмээ дээрээ өсчээ. Эмээ нь түүнийг загвар өмсөгч, жүжигчин болгохоор шахаж, “Гэр бүл болгонд нэг од хэрэгтэй” гэж боддог байсан хэмээн Андресен дурссан байдаг.
Тэрбээр ердөө 15 настайдаа 1971 онд Лукино Висконтигийн “Death in Venice” кинонд Тадзио хэмээх дүрийг бүтээснээр дэлхий дахины танил болсон юм.
Висконти түүнд “Дэлхийн хамгийн үзэсгэлэнтэй хүү” хэмээх нэрийг өгсөн бөгөөд уг нэр түүний амьдралыг бүхэлд нь бүрхсэн сүүдэр болон үлдсэн гэж тэр олон жилийн дараа дурссан байдаг. 
“Death in Venice” киноны амжилт түүнийг дэлхий даяар алдаршуулсан ч тэрбээр жүжигчний замнал бус хөгжмийн ертөнцөд сонирхолтой байсан бөгөөд чадварлаг төгөлдөр хуурч, хөгжмийн зохиолч болжээ.
Бьёрн Андресен 30 гаруй кино, телевизийн бүтээлд тоглосон бөгөөд сүүлд 2019 онд Ари Астерийн “Midsommar” аймшгийн кинонд өндөр настай эрийн дүрд тоглож, өөрийн үхлээр тахил өргөдөг хэсэгт орсон байдаг.2021 онд түүний тухай “The Most Beautiful Boy in the World” нэртэй баримтат кино гарч, олон жилийн дараа Бьёрн өөрийн дотоод шарх, алдар нэрийн үнэ цэнийг нээлттэй хуваалцсан билээ.
Түүний үхлийг “The Most Beautiful Boy in the World” баримтат киноны найруулагчид болох Кристиан Петри, Кристина Линдстрөм нар мэдэгдсэн байна. Нас барсан шалтгааныг одоогоор нийтэд мэдээлээгүй байна.
