УДЭТ-ын уран бүтээлчид Төрийн соёрхолт, Ардын уран зохиолч Б.Лхагвасүрэнгийн мэндэлсний 80 жилийн ойд зориулан “Үгүйлэгдсэн хайр” уянгын драмын жүжгийг арваннэгдүгээр сарын 12-ноос үзэгчдэд хүргэх байна. Ингэхдээ шинэ найруулга, шинэ бүрэлдэхүүнтэйгээр дахин сэргээж толилуулах аж.
Энэхүү уран бүтээл нь монгол хүний сэтгэлийн гүнд орших хайр, үгүйлэл, уучлалын уран яруу илэрхийлэл болсон бүтээл юм.
“Үгүйлэгдсэн хайр” жүжгийг анх 1988 онд найруулагч Э.Санчигдан тайзнаа амилуулж байсан бол 2015 онд Ардын жүжигчин, найруулагч Ч.Найдандорж найруулан олны хүртээл болгожээ. Харин энэ удаа Төрин соёрхолт, Урлагийн гавьяат зүтгэлтэн Н.Наранбаатар найруулна.
Төрийн соёрхолт, Ардын уран зохиолч Б.Лхагвасүрэнгийн “Үгүйлэгдсэн хайр” жүжгийг цаг мөч элэгдэх тусам хүний тухай, хүн хүнээ үгүйлэх, хайрлах , энэрэх сэтгэл хомсдож байгаа тухай өгүүлсэн, үзэгчид оюун ухаандаа хүний сэтгэл, энэрэл хайрын тухай эргэцүүлэн бодохуйц ухаарал хайрлаж, сургамж хайрлахаар онцгой ач холбогдолтой бүтээл хэмээдэг.
