Газрын маргааны зодоонд дүүгээ алдсан ах дүүс DH группээс өшөө авахаар шийдэж, мөрдөгчид хэргийн араас орж, тэд маш том хууль бус хүчний эсрэг тэмцэж буй тухай өгүүлдэг “Гарц” олон ангит кино өнгөрсөн 2024 онд үзэгчдийн хүртээл болсон.
Киног Б.Саруулбуян найруулж, дүрүүдэд Б.Баатархүү, Б.Гарамханд, Б.Одончимэг, Э.Тодгэрэл, Ц.Давааням, Т.Оюунболд, О.Анхсүх нарын уран бүтээлчид тоглож байв.
Эл киноны хоёрдугаар бүлгийг “Номадиа” пикчерс, “Фалко” энтертайнмент хамтран бүтээж, өнгөрсөн наймдугаар сараас үзэгчдэд хүргэсэн. Харин хоёрдугаар бүлэгт өмнөх бүлэгт тоглосон жүжигчдийн бүрэлдэхүүн дээр “Аримун” продакшны жүжигчин А.Ганчимэг нэмэгдэн, гол дүрд тоглосон юм.
Тэгвэл тус “Гарц” олон ангит киноны үргэлжлэл болох “Гарц-3: Төгсгөл” уран сайхны киноны нээлт өчигдөр /2025.11.06/ болж, бүх кинотеатруудаар гарч эхэллээ.
