МУБИС-ийн Багшийн сургуулийн Хөгжмийн боловсролын тэнхимд харааны бэрхшээлтэй хүүхдийг боловсролын үйлчилгээнд тэгш, хүртээмжтэй хамруулахад хөгжмийн сургалтад тулгамдаж буй асуудал сэдвээр хурал зохион байгуулжээ. Сургалтад Боловсролын ерөнхий газрын Тэгш хамруулах боловсролын хэлтсийнхэн, Хөгжмийн боловсролын тэнхимийн удирдлага, багш, оюутнууд болон 116 дугаар сургуулийн төлөөлөл оролцсон байна.
Багшийн сургуулийн Хөгжмийн боловсролын тэнхимийнхэн сургуулийнхаа судалгааны санхүүжилтээр харааны бэрхшээлтэй хүүхдүүд мөн их сургуулийн оюутан, ерөнхий боловсролын сургуулийн хөгжмийн багш, магистрант, докторант нарт зориулсан “Хүүхдийн дууны гарын авлага” 40 дууны нотыг брайл, кирилл хосолсон хэлбэрээр бэлтгэн хэвлэсэн байна. Үүнийг сайшааж буйгаа хуралд оролцогчид илэрхийлээд цаашид тэгш хамруулан сургах боловсролын бодлогын хэрэгжилт, анхаарах асуудал, харааны бэрхшээлтэй хүний хөгжмийн боловсролын өнөөгийн байдал зэрэг сэдвийн хүрээнд илтгэл хэлэлцүүлжээ. Мөн хөгжмийн боловсролыг хөгжүүлэхэд багшийн дэмжлэг ба сургалтын тулгамдсан асуудал, шийдлийг хэлэлцэн санал солилцсон байна.
