Австрийн зураач Густав Климтийн “Элизабет Ледерерийн хөрөг” зураг Нью-Йорк хотод болсон дуудлага худалдаагаар 236.4 сая ам.долларын үнэ хүрч зарагдсан тухай “Sotheby’s” дуудлага худалдааны ордон мэдээлжээ.
Уг бүтээлийг худалдан авсан хүний нэрийг нууцалсан бөгөөд дуудлага худалдаанд оролцсон зургаан хүн 20 минутын турш үнэ хаялцсан байна.
“Sotheby’s” ордон мэдээлэлдээ энэхүү бүтээлийг “орчин үеийн урлагийн түүхэнд хамгийн өндөр үнэ хүрч зарагдсан хөрөг зураг” хэмээн онцолжээ. Түүнчлэн дуудлага худалдаагаар зарагдсан үнээрээ хоёрдугаарт бичигдэж байна. Хамгийн өндөр үнээр зарагдсан уран зураг бол 2017 онд 450 сая ам.долларын үнэ хүрсэн Леонардо да Винчигийн “Дэлхийг аврагч” юм.
Виллем де Кунингийн “Interchange” (2015 онд 300 сая ам.доллар), Поль Сезанны “Хөзөр тоглогчид” (2012 онд 250 сая ам.доллар) гэсэн хоёр бүтээл мөн өндөр үнээр зарагдаж байжээ. Гэхдээ эдгээр нь нээлттэй дуудлага худалдаагаар бус, хувийн хэлцлээр зарагдсан байна.
Урлаг судлаачид Климтийн бүтээл ийм өндөр үнэд хүрсний шалтгааныг уран бүтээлийнхээ ид оргил үед зурсан, бүтэн биеийн хөрөг гэдгээр тайлбарлаж байна. Үүнтэй төстэй бүтээлүүдийнх нь ихэнх нь дэлхийн томоохон музейнүүдийн цуглуулгад байдаг. Климтийн өөр нэгэн бүтээл болох “Дэвүүртэй хатагтай” 2023 онд Лондонд болсон дуудлага худалдаагаар 85.3 сая фунт стерлингээр (94 сая евро) зарагдсан байна.
“Элизабет Ледерерийн хөрөг” нь Климтийн гол ивээн тэтгэгчдийн нэг, Австрийн үйлдвэрийн эзэн Аугуст Ледерерийн охиныг дүрсэлсэн бүтээл юм. Хятадын эзэн хааны хэв маягийг санагдуулам нарийн чимэглэл бүхий цагаан даашинзтай бүсгүйг Дорны өнгө аястай хөх гобелен дэвсгэр дээр дүрсэлжээ.
Энэхүү бүтээлийг Климт 1914-1916 оны хооронд, нас барахаасаа хоёр жилийн өмнө туурвижээ. Дайны жилүүдэд нацистууд уг зургийг хураан авсан хэдий ч дараа нь Ледерерийн гэр бүлд буцаан өгчээ. Харин сүүлийн жилүүдэд уг хөрөг “Estée Lauder” брэндийн өв залгамжлагч Леонард Алан Лаудерийн цуглуулгад хадгалагдаж байсан байна. Тэрбээр 2025 оны зургаадугаар сард нас баржээ.
Густав Климт бол бэлгэдэл зүй болон Венийн модерн урсгалын нэртэй төлөөлөгч гэж тооцогддог. Түүний шилдэг бүтээлүүд туурвиж байсан үеийг “алтан эрин” гэж урлагийн түүхэнд бичжээ. Харин энэ эриний оргил болсон бүтээлүүд бол “Үнсэлт”, “Адель Блох-Бауэрийн хөрөг” юм.
