Буриад зоны хоёр жил тутамд зохион байгуулдаг “Алтаргана-2026” соёлын их наадам ирэх оны долдугаар сарын 1-5-нд Улаан-Үд хотноо болно. Буриадын харилцаа дуу, цэц булаалдах, үлгэр домог, тууль ярилцах, ёохор хатирах, сур харваа, буриад үндэсний хувцас зэргээр “Алтаргана” соёлын их наадмын тэмцээн уралдаан нь улам бүр баяжин хөгжсөөр иржээ. Ирэх онд болох “Алтаргана” наадамд буриад ардын суухан-хуур болон суур хөгжмийн төрөл, нютагай бужиг буюу буриад ардын бүжгийн төрлийг шинээр нэмж буй аж. Сонирхуулахад, суухан-хуур гэдэг нь бух, хайнагийн хатаасан давсгаар урлан хийдэг, дэлхий дээр ганц чавхдас бүхий цор ганц үндэсний хөгжмийн зэмсэг юм. Харин суур нь хуш, шинэс модоор хийдэг, зургаан нүхт үлээвэр хөгжмийн зэмсэг юм байна. Нютагай бужиг төрлөөр устаж үгүй болж буй буриад ардын гоцлол болон дуэт бүжгийн номинацийг сэргээж, буриад зоны ахуй амьдрал, зан заншлыг судалж, зан үйлийн хийгээд хүн-байгалийн харилцааг өгүүлэх амьд хөгжимтэй бүжгийн төрлийг оруулахаар зохион байгуулагчид нь шийджээ. Үүнээс гадна “Алтаргана маркет” гар урлал, бэлэг дурсгал, брендинг бүтээгдэхүүний үзэсгэлэн худалдааг гэр хотхон хэлбэрээр дэлгэнэ.
“Алтаргана-2026” наадамд шинээр хоёр төрөл нэмэгдэнэ
