Өмнөд Солонгосын кино үйлдвэрлэлийн салбарын орлого сүүлийн үед огцом буурч, эсрэгээрээ зардал нь өсөх болсон. Иймд кино бүтээгчид төсөв багатай үйлдвэрлэл рүү чиглэж, хиймэл оюун ухааны технологи ашиглах нь олширчээ.
Энэхүү шилжилтийг түүчээлж буй найруулагчдын нэг бол “Бусан хүрэх галт тэрэг” киногоороо танигдсан Ён Сан Хо. Тэрбээр энэ онд ер бусын бага төсөвтэйгээр “Царай муут” гэх киног бүтээсэн нь төсөөлөмгүй их амжилт дагуулаад байна. Тиймээс яг энэ стратегиэ баримтлан дараа дараагийн төслүүд дээрээ ажиллахаар төлөвлөжээ. “Царай муут” кино ойролцоогоор 200 сая воны төсөвтэйгөөр бүтсэн бөгөөд нэг сая гаруй үзэгчийг татаж, 11 тэрбум воны ашиг олсон. Өөрөөр хэлбэл, тус киноны орлого нь зардлаасаа 50 дахин байлаа.
Найруулагч Ён Сан Хо “Царай муут” киногоо бүтээхдээ зөвхөн нэг удаагийн туршилт гэж бодоогүй, цаашдын зам жимийг тодорхойлохоор зорьжээ. Түүний багадаа үздэг байсан ази кинонууд ихэнх нь төсөв багатай бүтсэн ч ер бусын их амжилт олж байсныг тэр жишээ татсан байна.
Ён Сан Хогийн “Wowpoint” кино компани болон “CJ” энтертайнмент хамтран “Алдагдсан диваажин” нэртэй киног төлөвлөөд байна. Уг киноны зардал нь 500 сая вон байх аж. Энэхүү шинэ төсөлд сураггүй алга болоод есөн жилийн дараа эргэн ирж буй хөвгүүний тухай гарна. Гол дүрд нь ахмад жүжигчин Ким Хюн Жү тоглох юм байна.
Найруулагч Кан Юн Сун ч бас хиймэл оюун ухаан ашиглан “Баруунш зугтсан нь” нэртэй киног бүтээжээ. 60 минут үргэлжлэх тус киног харьцангуй бага хугацаанд, бага төсөвтэйгөөр бүтээж чадсан нь энэ салбарын нэгэн дэвшил болж байна. Тус кинонд машины дэлбэрэлт, барилга нуралт, уралдаж хөөцөлдөж буй хэсэг зэрэг дээр хиймэл оюун ухааныг үр дүнтэйгээр ашиглажээ. Бодит байдал дээр 4-5 өдөр зарцуулж авах зураг авалтыг хиймэл оюун ухаан ашигласнаар 10-хан минутад бэлэн болгож байгаа аж. Мөн киноны нийт зардал нь 1.5 тэрбум вон болжээ.
Кино үйлдвэрлэлд хиймэл оюун ухаан ашиглах нь зардал болон цаг хугацаа хэмнэж, санхүүгийн эрсдэл багасгах хамгийн том давуу талтай. Үүний зэрэгцээ дэвшилтэт шинэчлэлийг өргөн хүрээнд санал болгож буйгаараа онцлог.
Одоогоор нэг кино үйлдвэрлэхэд дунджаар 10 тэрбум вон зарцуулдаг. Төсөв мөнгөний асуудлаас болоод бүтээгчид төсөөллөө хязгаарлахад хүрдэг гэдгийг салбарынхан хэлж байна.
