Соёл, спорт, аялал жуулчлал, залуучуудын яамнаас “Соёл, спорт, аялал жуулчлал, залуучуудын төсвийн ерөнхийлөн захирагчийн харьяа байгууллагуудын үр дүнд суурилсан санхүүжилтийн үр ашгийг нэмэгдүүлэх, санхүүгийн аудитаар илрэх зөрчлийг бууруулах, төвлөрүүлэн захирагчийн бүтэц, орон тоо, төсөв санхүүгийн асуудал” сэдэвт сургалтыг 2025 оны 12 дугаар сарын 8-ны өдөр “Чингис хаан” үндэсний музейд зохион байгууллаа.
Сургалтад Кино урлагийн зөвлөл бөгөөд Ажлын албаны дарга Ч.Ундрал, КУЗАА-ны Захиргаа, санхүүгийн газрын дарга А.Энхнаран, Олон улсын хамтын ажиллагааны газрын дарга Б.Оргилмаа болон бусад албаны төлөөллүүд оролцож, салбарын байгууллагуудын санхүүгийн сахилга бат, үр ашгийг дээшлүүлэх бодлогын мэдээлэл солилцлоо.
Сургалтын төгсгөлд Кино урлагийн зөвлөлийн ажлын албаны Олон улсын хамтын ажиллагааны газрын дарга Б.Оргилмаа “Кино зураг авалтын зөвшөөрөл” болон “Кино бүтээх зардлын буцаан олголт”-ын хэрэгжилтийн талаар 21 аймгийн Соёл, урлаг, аялал жуулчлал, залуучуудын газрын удирдлага, төлөөлөлд танилцуулав.
Танилцуулгын хүрээнд буцаан олголтын зохицуулалт, шаардлага, хэрэгжилтийн мэдээллийг хүргэхийн зэрэгцээ орон нутагт олгож буй зураг авалтын зөвшөөрөлд хяналт тавих боломж, нөхцөлийг сайжруулах чиглэлээр хамтран ажиллах талаар санал солилцлоо.
Түүнчлэн кино урлагийн нөлөөгөөр даган ирсэн жуулчдын тоо нэмэгдэж, аялал жуулчлал, эдийн засаг зэрэг дагалдах салбаруудад эерэг нөлөө үзүүлж байгааг онцлов.
