“Warner Bros Discovery” компани “Paramount Skydance”-ийн худалдан авах саналаас албан ёсоор татгалзаж, “Netflix”-тэй байгуулсан хэлцэл нь хувьцаа эзэмшигчдийн урт хугацааны ашиг сонирхолд илүү нийцнэ гэж мэдэгдлээ. Тус мэдэгдлийг лхагва гараг /2025.12.17/-ийн өглөө “Warner Bros Discovery” компанийн хувьцаа эзэмшигчдэд илгээсэн захидал болон АНУ-ын Үнэт цаас, биржийн комисс (SEC)-т өгсөн албан мэдүүлгээрээ дамжуулан нийтэлжээ.
“Warner Bros Discovery” компанийн ТУЗ-өөс “Paramount”-ын дэвшүүлсэн нэгж хувьцааны 30 ам.доллар буюу нийт 108.4 тэрбум ам.долларын худалдан авах саналыг “хангалттай үнэ цэн өгөөгүй, олон ноцтой эрсдэл дагуулсан, бодит бус” гэж дүгнэжээ. Харин “Warner Bros”-ын кино студи болон стриминг бизнесийг хамарсан “Netflix”-ийн хэлцэл нь санхүүжилтийн хувьд илүү тодорхой, зохицуулалтын эрсдэл багатай, хувьцаа эзэмшигчдэд урт хугацаанд тогтвортой өгөөж өгөх боломжтой гэж үзсэнээ тус компанийн ТУЗ мэдэгдэв.
ТУЗ-ийн энэхүү шийдвэрээ хараахан эцэслээгүй аж. Одоогоор “Paramount”-ын саналаас татгалзаж, “Netflix”-ийн хэлцлийг дэмжих зөвлөмж гаргасан байгаа бөгөөд 2026 оны хавар эсвэл зуны эхээр хувьцаа эзэмшигчдийн санал хураалтаар эцсийн шийдвэр гарах төлөвтэй байна.
“Netflix” болон “Warner Bros”-ын хэлцэл одоогоор АНУ, Европын өрсөлдөөний зохицуулагчдын хяналтад байгаа бөгөөд ямар нэгэн эцсийн зөвшөөрөл эсвэл хориг гараагүй байна. Зохицуулагчид зах зээлийн төвлөрөл, хэрэглэгчдийн сонголт хумигдах эрсдэлийг үнэлж байна.
“Paramount”-ын саналтай холбоотойгоор санхүүжилтэд Ойрх Дорнодын төрийн сангууд оролцож болзошгүй гэж үзэж, АНУ-ын хууль тогтоогчид үндэсний аюулгүй байдалд нөлөөлөх эсэх талаар болгоомжилж буйгаа илэрхийлээд байгаа юм. АНУ-ын Ерөнхийлөгч Доналд Трамп уг хэлцэлд шууд оролцсон гэх баримт байхгүй ч улс төр, гадаад санхүүжилтийн эрсдэл нь “Paramount”-ын саналыг сулруулж байна гэж шинжээчид дүгнэжээ.
Шинжээчдийн тайлбараар “Netflix” зөвхөн студи болон стриминг үйлчилгээг авах тул зохицуулалтын саад харьцангуй бага, улс төр болон гадаад нөлөөний эрсдэл ч мөн бага байна. Мөн “Warner Bros”-ын өргөн контентын санг ашиглан стримингийн зах зээлд стратегийн давуу байр суурь эзлэх зорилго нь тодорхой байгаа зэрэг нь “Netflix”-ийн давуу талд тооцогдож байна. Үүний зэрэгцээ “Netflix” “Warner Bros”-ийн кинонуудыг кино театруудаар гаргана гэдгээ олон нийтэд ил тод мэдэгдсэн.
“Paramount” илүү өндөр, баталгаатай шинэ санал гаргах боломжтой хэвээр байгаа ч “Warner Bros Discovery”-ийн зүгээс “Netflix”-ийн хэлцлийг дэмжсэнээр Холливудын томоохон худалдан авалтын өрсөлдөөн 2026 он хүртэл үргэлжлэх бололтой.
