“ЮНЕСКО-д бүртгүүлсэн Монголын соёлын биет бус өвүүд-2” сэдэвт хоёр блок, зургаан нэрийн цуврал шуудангийн маркийн нээлт /2025.12.19/ Соёл, спорт, аялал жуулчлал, залуучуудын яаманд боллоо.
Монгол Улс 2024 оны байдлаар нийт 17 соёлын биет бус өвийг (СББӨ) ЮНЕСКО-д бүртгүүлсэн байна. Эдгээрээс “Монгол шуудан” ХК 2019 онд “ЮНЕСКО-д бүртгэгдсэн Монголын соёлын биет бус өвүүд” сэдэвт хоёр блок, таван нэрийн анхны цуврал маркийг гүйлгээнд гаргасан.
Үүний үргэлжлэл “ЮНЕСКО-д бүртгүүлсэн Монголын соёлын биет бус өвүүд-2” сэдэвт хоёр блок, зургаан нэрийн шуудангийн хоёрдахь цуврал маркинд Монголын найман соёлын биет бус өвийг дүрслэн харуулжээ. Үүнд, Монгол тууль (2009), Монголын уламжлалт Хөөмэйн урлаг (2010), Монгол баяр наадам (2010), Монгол лимбэчдийн уртын дуу тоглох уламжлалт арга барил-битүү амьсгаа (2011), Монгол гэрийн уламжлалт урлал, зан үйл (2013), Ботго авахуулах зан үйл (2015), Уул овоо тахих Монгол зан үйл (2017), Хөхүүрийн айраг исгэх уламжлал, холбогдох зан үйл (2019) багтаж байна.
Ингэснээр ЮНЕСКО-д бүртгүүлсэн Монголын 17 соёлын биет бус өвөөс 15 нь шуудангийн марк болж хэвлэгдлээ.
Маркийг Бүгд Найрамдах Франц Улсад хэвлэсэн бөгөөд сонирхсон хүмүүс хот, хөдөөгийн шуудангийн салбаруудаас худалдан авч болох ажээ.
