Өмнөд Солонгосын “The Naver” платформын цуврал “Princess Goes to School” дээр Ким Сол гэх нэртэй ахлах ангийн охины дүр гардаг. Романтик хошин өгүүлэмжтэй тус цувралын дүр Ким Сол өөрийгөө Хойд Солонгосын удирдагчийн охин, эрх мэдлийг залгамжлагч гэдгээ мэддэггүй. Мөн өөрийг нь хамгаалахаар томилогдсон тагнуулын ажилтан залуутай харилцаа тогтоож буйгаар гардаг.
Тэгвэл Ким Солын дүр төрх Хойд Солонгосын удирдагч Ким Жон Уны охин Ким Чу Аэтэй адилхан байгаа нь шуугиан дэгдээгээд байна. Түүнчлэн Хойд Солонгосын гүнжийг баатарлаг, энэрэнгүй нэгэн мэтээр харуулсан энэ дүр Кимийн дэглэмийн талаарх ойлголтыг илүү зөөлрүүлж байна гэж үзэх хүмүүс ч гарав. Ким Жон Уны өндөр нууцлалтай гэр бүлээс тэс өөр амьдралыг “Princess Goes to School” цувралд харуулах аж. Түүх болон дүрүүд нь зохиомол ч гэлээ олон талаараа Кимийн гэр бүлтэй төстэй байгааг үл тоомсорлож болохгүй гэж олон хүн үзжээ.
Цувралын үйл явдлаас дурдвал Ким Сол охин ангидаа нэр хүндтэй нэгэн. Түүний амийг хөнөөх гэсэн олон удаагийн оролдого гарах ч Өмнөд Солонгосын тагнуулын ажилтнууд удаа дараалан хөндлөнгөөс оролцож, охиныг хамгаалдаг.
“Princess Goes to School” цуврал өнгөрсөн Пүрэв гаригт /2025.12.18/ эхний ангиа цацсан. Ердөө ганц анги гарсан боловч үнэлгээ нь ердөө 1.92 /5 байх ёстой/ байна. Мөн сэтгэгдэл хэсэгт нь сөрөг сэтгэгдлүүд их байна.
