Өмнөд Солонгосын жүжигчин Ан Сон Ги 74 насандаа таалал төгсжээ.
Тус улсын Кино жүжигчдийн холбооны мэдээлснээр, Ан Сон Ги нь өнөө өглөө /2026.01.05/-ний 09:00 цагийн орчимд Сөүлийн Ёнсан-гу дахь Сунчуньян их сургуулийн эмнэлгийн эрчимт эмчилгээний тасагт эмчлүүлж байгаад таалал төгссөн байна.
Өнгөрсөн сарын 30-нд гэртээ хооллож байхад нь хоолойд нь хоолны зүйл гацаж, ухаан алдаж, эрчимт эмчилгээний тасагт ухаангүй байж байгаад зургаан хоногийн дараа өөд боллоо. Талийгаач 2019 оноос хойш цусны хорт хавдартай тэмцэж байсан бөгөөд тайзнаа эргэн ирэх бэлтгэлээ хийж байжээ.
Ан Сон Ги бол гайхалтай жүжиглэх ур чадвараараа төдийгүй шударга зангаараа хүндлэгдэж, хайрлагддаг Солонгосын нэр хүндтэй кино жүжигчин байв.
Тэрбээр 1957 онд найруулагч Ким Ги Ёны “Бүрэнхий галт тэрэг” кинонд хүүхдийн жүжигчнээр кино урлагт хөл тавьсан юм. Ан Сон Ги 69 жилийн карьерынхаа туршид 170 гаруй кинонд тоглосон чадварлаг жүжигчин байлаа.
Түүнтэй салах ёс гүйцэтгэх ёслолыг Сөүлийн Гэгээн Мэригийн эмнэлэгт хийх аж.
