Алдарт инээдмийн жүжигчин Роуэн Аткинсон өнөөдөр 71 нас хүрч байна. Тэрбээр 1955 оны энэ өдөр буюу нэгдүгээр сарын 6-нд Английн Консетт хотод төржээ. Түүний эцэг эх гурван хүүхэд өсгөсөн бөгөөд урлагаас хол, хөдөлмөрлөж байж талхаа олсон хүмүүс байв. Аав Эрик нь фермер байсан бол ээж Элла Мэй хүүхдүүдээ өсгөн хүмүүжүүлж, нөхөртөө тусалдаг байлаа.
Роуэн багаасаа инээдмийн авьяастай гэдгээ харуулсан юм. Өвөрмөц нүүрний хувиралтай тэрбээр хүн бүрийг, ялангуяа үе тэнгийнхнээ инээлгэх төрөлхийн чадвартай байжээ. Хүү сургуульд орохдоо тэр даруй гол алиалагч, хошигногч хочтой болжээ. Түүнийг 11 настай байхад эцэг эх нь нэр хүндтэй Чорристер сургуульд суралцуулахаар шийджээ.
Их сургуулиа төгсөөд зан араншингаа эргэн харж, даруухан, буурьтай залуу болжээ. Тухайн үед тэр урлагийн мэргэжлийг сонгох талаар бодож байгаагүй. Роуэн Аткинсон электроникийн чиглэлээр ажиллахыг хүсэж байсан бөгөөд энэ чиглэлээрээ ч асар их ирээдүйтэй байсан юм. Тэрбээр Ньюкасл их сургуулийн оюутан болж, физикийг шүтэж, асар том томьёог хялбархан цээжилдэг байв. Тийм ч учраас Оксфордод суралцах, докторын зэрэг хамгаалах санал хүлээж авч байжээ.
Оксфордод суралцсан хоёр дахь жилдээ Роуэн их сургуулийн туршилтын театр, драмын клубт элссэн юм. Сургуулийнхаа хэд хэдэн хошин урлагийн наадамд түрүүлсэн тэрбээр ер бусын нэр хүндтэй болж эхэлсэн байна.
Карьерынхаа эхэн үед телевизийн шоунд тоглож, радиогийн нэвтрүүлэгт оролцож байв. Удалгүй тэрбээр “Есөн цагийн мэдээ биш” нэртэй өөрийн нэвтрүүлгээ хийж эхлэв. Шоу 1979 оны намар цацагдсан бөгөөд дэлгэцнээ гармагцаа маш их алдартай болсон юм.
Хамгийн анх Роуэн “Хар могой” кинонд тоглох урилга авчээ. Энэхүү инээдмийн кинонд Стивен Фрай, Хью Лори нар хамтран тоглов.
1989 онд бүх орны кино сонирхогчид авъяаслаг инээдмийн жүжигчний талаар олж мэдсэн. Учир нь “Мистер Бин” анх удаагаа телевизийн шинэ жилийн дугаарт гарч ирсэн явдал байв. Энэ дүрийг Роуэн Оксфордын их сургуульд сурч байхдаа бодож олжээ. Таван жилийн турш үзэгчид “Мистер Бин”-ий адал явдлыг маш их таашаалтайгаар үзэж байсан юм. Гэхдээ хамгийн амжилттай дүрүүд ч жүжигчдийг залхаадаг. Роуэн “Мистер Бин”-ээс залхах үедээ шүтэн бишрэгчиддээ хандан албан ёсны мэдэгдэл хийв. Жүжигчин “Ноён Биний амралт” кино гарсны дараа эл кинонд тоглохоо болино гэдгээ хэлсэн. Энэ кино 2007 онд гарсан юм.
Тэрбээр үргэлжлүүлэн “Хархны уралдаан”, “Араатны хаан арслан”, “Агент Жонни Инглиш”, “Майгрет”, “Вонка” гэхчилэн 20 гаруй алдартай кинонуудад тоглосон юм.
