Сэлэнгэ аймгийн Шаамар сумын харьяат, Монгол Улсын Гавьяат жүжигчин З.Жарантав Сэлэнгэ аймгийн “Хүндэт иргэн” боллоо.
Түүний соёл урлагийн салбарт 50 гаруй жил идэвх зүтгэл, үр бүтээлтэй ажиллаж, драмын болон тайз дэлгэцийн олон арван гол дүрийг бүтээж, соёл урлагийн салбарт оруулсан үнэтэй хувь нэмрийг нь үнэлж, аймгийн ИТХ-ын даргын А/62 дугаар захирамжаар энэхүү хүндэт өргөмжлөл хүртээжээ.
З.Жарантав 1942 онд Сэлэнгэ аймгийн Шаамар суманд төрсөн байна. Тэрбээр 1961 онд Драмын театрт дагалдан жүжигчнээр ажлын гараагаа эхэлж, 1963-1967 онд УБДС-ийн кино драмын ангид суралцаж төгссөнөөр мэргэжлийн жүжигчин болжээ.
Оюутан байхдаа “Хүний мөр” киноны олны хэсэгт орж наадмаар Чинбатын ард зогссоноор кино урлагтай холбогджээ. Түүнчлэн “Хүний мөр”, “Цэргийн хүү”, “Уулзалт”, “Хатанбаатар”, “Үүр цайхын өмнө”, “Би чамд хайртай”, “Мөнгөн буйл”, “Үлгэр дууссан хойно”, “Амьдралын нахиа”, “Хачин хүн”, “Цагаан сүүдэр” кинонд дүр бүтээсэн нь үзэгчдийн сэтгэлд хоногшсон төдийгүй сүүлийн жилүүдэд ч залуучуудтайгаа мөр зэрэгцэн олон сайхан дүр бүтээсээр буй.
