“Түмэн тэмээний баяр-2026”-ыг 27 дахь жилдээ Даланзадгад суманд хоёрдугаар сарын 6-8-ны өдөр зохион байгуулна.
Говийн аялал жуулчлалын томоохон баярыг нэг болох “Түмэн тэмээний баяр-2026”-аар хурдан тэмээний уралдаан, богино зайн уралдаан, пайз дамжуулах тэмээтэй буухиа, “Ингэний сүүний баяр, Өмнөговьд үйлдвэрлэв” ингэний сүү цагаан идээ, тэмээний ноос ноосон бүтээгдэхүүн, бэлэг дурсгалын үзэсгэлэн худалдаа, тэмээтэй буухиа тэмцээн, эмнэг тэмээг бугуйлдаж барих, буйллах, зогдор хяргаж бурантаг томох, бурантаглах, эмнэг тэмээг сургах, тэмээн жин ачаалах, тэмээн жингийн цуваагаар алхах зэрэг олон сонирхолтой үзүүлбэрүүд багтаж байгаагаараа онцлогтой.
Уламжлалт баярт өмнөх жил зургаан аймгийн 21 сумын малчид оролцсон бол гадаад, дотоодын 10 гаруй орны 100 орчим тэмээний мэргэжилтэн, зочид төлөөлөгчид зорин ирж үзсэн юм.
Мөн ингэний айргийн баяр үзэсгэлэн худалдааг зохион байгуулж, 5 аймгийн 120 бизнес эрхлэгч, 50 ААНБ оролцож 78.2 сая төгрөгийн борлуулалт хийж байжээ.
