Ховд аймгийн Дарви сумын нутагт оршдог Загал баатрын хиргисүүр нь 11 метр өндөр, 70 гаруй метрийн голчтой. Нутгийн иргэд уг дурсгалыг Загал баатрын хиргисүүр, Өндөр овоо гэх мэтээр нэрлэдэг.
Уг хиргисүүр нь Монгол орны хамгийн томд тооцогдох бөгөөд зарим судлаачийн үзэж байгаагаар зөвхөн Монголд төдийгүй Ази тивд ч томоохонд орно. Өөрөөр хэлбэл, энэ хиргисүүр нь Ази тивд оршдог хамгийн том гурван хиргисүүрийн нэг юм.
Ази тивд томд тооцогдох Бешшатыр хиргисүүр нь Казахстаны Илий голын хөндийд оршдог Сака соёлын үеийн том булшны цогцолбор бөгөөд гол булш нь ойролцоогоор 17 метр өндөр, 105 метрийн диаметртэй.
Мөн Боралдай хиргисүүр нь Алматын ойролцоо оршдог Сака соёлын үеийн кураг бөгөөд хамгийн том булш нь ойролцоогоор 14 метр өндөр, 100 метрийн голчтой байна.
Хиргисүүрийн талаар нутгийн иргэдийн дунд олон домог, хууч яриа хадгалагдан үлджээ. Тухайлбал, эх орныхоо төлөө дайтаж явсан баатрын шарилыг харийн нутагт алдахаас сэргийлж, ийм өргөн, өндөр хад чулуугаар дарж булсан гэх ам дамжсан яриа бий.
Хиргисүүр буюу чулуун овоот булшны соёл нь Монголын баруун бүс нутагт өргөн тархсан хүрэл зэвсгийн үеэс төмөр зэвсгийн эхэн үед хамаарах соёл юм.
Хиргисүүр нь оршуулгын байгууламжийн болон тахилгын зориулалттай гэсэн хоёр үндсэн төрөлтэй. Загал баатрын хиргисүүр нь оршуулгын байгууламжийн төрөлд хамаарна.
