“Өвөрхангайн урчууд-2026” соёлын үйл ажиллагаа энэ сарын 9, 10-ны өдрүүдэд тав дахь жилдээ болно.
Соёлын биет бус өвийн долоон ай савын уламжлалт гар урлалын нэгэн төрөл болох модон сийлбэрийн урлалыг сурталчлах, өвлөн уламжлуулах зорилгоор Өвөрхангай аймгийн Хархорин сумын харъяат, нэрт сийлбэрч Н.Одхүүгийн нэрэмжит болгон зохион байгуулах юм.
Сийлбэрч, уран дархан Н.Одхүү нь Хархорум хотын макет, Шанхын баруун хүрээнд хадгалж байсан Чингисийн хар, цагаан сүлдний буйр дээрх боржин чулуун хөшөө, Их алаг сүлд, Майдар бурхны морь тэрэг, Өндөр гэгээний хөрөг, зээгт наамал, Хархорины гурил тэжээлийн үйлдвэрт баатрын хуяг хувцас, “Хархорин Өргөө” жуулчны баазын мөнгөн мод, аймгийн музейн сийлбэрүүд, Чингис хааны музейд эмээл зэрэг олон бүтээлийг урлаж өгсөн байна. Мөн аймгийн Хөгжимт драмын театрын чимэглэл, сийлбэр зургийг хийж тохижуулжээ.
Түүний аав Д.Намсрай мөн гарын уртай хүн байсан ба лам нарын гар үйлдвэрт ажилчин, мастер, артелийн дарга зэрэг алба хашин үйлдвэр, хоршооллын байгууллагад дөчөөд жил ажилласан байдаг. Өөрийн хүү О. Мягмарсүрэн, О. Ангарагсүрэн нар нь улсдаа нэртэй чулуун сийлбэрч, уран зураачид юм. О.Ангарагсүрэн Япон улсын Киото Их Сургууль, Хүн ба Байгаль Шинжлэлийн Сургуульд Соёлын өвийн хадгалалт хамгаалалт, сэргээн засварлалтын чиглэлээр докторын зэрэг хамгаалж, өв соёлоо хамгаалах үйлсэд хүчин зүтгэж явна.
“Өвөрхангай бол гэрийн модон үйлдвэрлэлээрээ алдартай. Модон сийлбэрийн урлалаар хамгийн олон алдартнуудыг төрүүлсэн, монгол гэрийг дэлхийн соёлын өвд бүртгүүлэхэд чухал үүрэг гүйцэтгэсэн аймаг юм” хэмээн аймгийн СУАЖГ-ын Соёл урлагийн хэлтсийн дарга, Соёл, судлалын ухааны доктор (Ph.D) Л.Пүрэвлхам хэллээ.
