Италийн засгийн газар барокко урлагийн мастер Караважжиогийн зурсан нэгэн ховор хөргийг 30 сая еврогоор худалдан авчээ. Энэ нь тус улсын урлагийн бүтээлд төлсөн хамгийн өндөр үнийн нэг болсон байна.
Италийн соёлын сайд Алессандро Жиули уг бүтээл нь “онцгой ач холбогдолтой” бөгөөд томоохон урлагийн бүтээлүүдийг хувийн цуглуулагчдад алдахгүй байх төрийн бодлогын нэг хэсэг гэжээ.
Зураг нь ламтан Маффео Барберинигийн хөрөг бөгөөд тэрээр хожим Пап Урбан VIII болсон юм. Уг зураг өмнө нь Флоренц хотын хувийн цуглуулгад хадгалагдаж байсан бөгөөд 2024 онд Ром хотод анх олон нийтэд үзүүлж байв.
Караважжиогийн бүтээлүүдээс дэлхий даяар ойролцоогоор 65 нь л үлдсэн байдгийн зөвхөн гурав нь хөрөг зураг юм. Зургийг одоо Палаззо Барберини ордны байнгын цуглуулгад шилжүүлсэн. Энэ ордон нь хөрөгт дүрслэгдсэн гэр бүлийн түүхэн ордон бөгөөд Ром хотод байрладаг.
1598 оны орчимд зурсан уг бүтээлд Барберини сахалтай, ламын хувцастайгаар баруун гараа сунган заавар өгч буй мэтээр дүрслэгджээ. Барберини 1623 онд пап лам болж, 1644 онд нас барах хүртлээ албаа хашсан. Тэрээр урлагийг ивээн тэтгэдэг гэдгээрээ алдартай байжээ.
Караважжиогийн жинхэнэ нэр нь Микеланжело Мериси бөгөөд тэр 1610 онд 38 настайдаа нас барсан. Тэрээр Чиароскуро хэмээх гэрэл ба сүүдрийн хурц эсрэгцлийг ашиглан дүрслэдэг аргаараа алдартай байжээ.
