Соёлын гавьяат зүтгэлтэн, сэтгүүлч Ц.Балдоржийн “Хориотой” драмын жүжиг өнөөдрөөс 20 жилийн өмнө “Х ТҮЦ” продакшны тавилтаар үзэгчдийн хүртээл болж байв. Харин өнгөрсөн гуравдугаар сард “Xermel crew”-гийн санаачилгаар “Орфей” театрын найруулагч М.Батболд уг төсөлд хамтарч, үзэгчдийн хүртээл болгосон.
Жүжигчин Н.Баясаа, С.Батзориг, Г.Лхагвацэрэн, У.Цогтбаяр, Р.Сүхболд нар буюу “Xermel crew”-гийн уран бүтээлчид, F Studio хамтран “In da House” адал явдалт, инээдмийн уран сайхны киног 2021 онд үзэгчдэд хүргэж байв. Мөн 2022 онд “In da House: Come back” киног үргэлжлүүлэн бүтээж байлаа. Цаашлаад уг уран бүтээлчид “In da House 3: in Korea” киног БНСУ-ын уран бүтээлчидтэй хамтран бүтээснээ өнгөрсөн 2025 онд олны хүртээл болгосон. Түүнчлэн “Хэрмэл жүжигчид” киног бүтээж, хүргэснээр нь дэлгэцийн урлагт дурлагсад анхдахгүй.
Тэгвэл энэ удаа “Xermel crew”-гийнхэн өөрсдийгөө тайзны уран бүтээлд сорьсон нь “Хориотой” жүжиг байсан юм. “Хориотой” жүжгийн үзэл санаа яг энэ цаг үед нийгмийн шаардлага, хүсэлт, хүлээлт мөн гэдгийг уран бүтээлчид онцолж буй бөгөөд жүжгийг ирэх тавдугаар сарын 1-10 хүртэл “Zaisan Hill”-д дахин толилуулахаар болжээ.
