Монголын орчин үеийн урлаг, өв соёлыг олон улсад таниулах сурталчлах зорилготой “Монгол” арт галерей энэ хавар нэгэн түүхэн үйл явдлын эхлэлийг тавьж байна.
Тус галерей Азийн тэргүүлэх урлагийн үйл ажиллагаа болох “Бээжин Дандай 2026” /Beijing Dangdai Art Fair/ олон улсын арт экспод албан ёсоор оролцох болсноор энэхүү нэр хүндтэй үзэсгэлэнд оролцож буй анхны Монгол галерей болж байна.
Энэ жилийн “Бээжин Дандай” үзэсгэлэнг “Газрын мөр” /LAND TRACE/ ерөнхий сэдвийн хүрээнд Бээжин хотын Үндэсний хөдөө аж ахуйн үзэсгэлэнгийн төвд энэ сарын 21-24-нд зохион байгуулах аж.
Үзэсгэлэнд зориулан “Монгол” арт галерей нь “Хүмүүний мөр, бидний мөр” /Human Traces, Shared Traces/ нэртэй хамтарсан үзэсгэлэнг толилуулахаас гадна Монголын уран барималч Н.Лхагвасүрэн, Хятадын зураач Жун Тяньбин нарын бүтээлийг дэлгэн үзүүлнэ. Урлаг, амьдралын бараг хорин жилийн нөхөрлөлөөр холбогдсон эдгээр уран бүтээлч олон улсын тайзнаа анх удаа хамтран оролцож буй нь онцлог юм.
Тэдний нөхөрлөл 2007 онд эхэлж, Жун Тяньбин Н.Лхагвасүрэнг Бээжингийн Сунжуан урлагийн хотхонд урьснаар уран бүтээлийн гүн холбоо тогтжээ. Хорин жилийн дараа тэд ийнхүү “Бээжин Дандай”-н тайзнаа дахин уулзаж, бүтээлээрээ дамжуулан цаг хугацаа, орон зайг холбосон түүхийг өгүүлж байна.
Үзэсгэлэнд Н.Лхагвасүрэнгийн нүүдэлчдийн гүн ухаан, байгаль дэлхийн шүтэлцээнээс улбаатай сүрлэг хүрэл баримлууд болон Жун Тяньбиний “Сунжуангийн дүр зураг” хэмээх дижитал хуйлмал бүтээлүүдийг хослуулан толилуулна. Эдгээр бүтээл нь Монголын уудам талаас Шар мөрөн хүртэлх хүмүүний оршихуйн хөдөлгөөнийг илэрхийлж, эртний экологийн мэдлэг оюуныг хүрлийн хүнд, үнэ цэнтэй чанараар амилуулах юм.
Евроазийн эх газрыг дамнасан соёлын солилцоо, нийтлэг түүхийн ул мөрийг харуулсан энэхүү үзэсгэлэн нь “Газрын мөр” сэдвийн мөн чанарыг тод томруун илтгэнэ гэж зохион байгуулагчид онцолж байна.
