Улсын хүүхэлдэйн театрын уран бүтээлчид шинэ уран бүтээлээ бяцхан үзэгчдэдээ хүргэх гэж байна. Тодруулбал, Соёлын гавьяат зүтгэлтэн, хүүхдийн зохиолч О.Сундуйн зохиол “Мөчрөн хуруут” хүүхэлдэйн жүжгийн тавдугаар сарын 24-ний өдөр нээх юм. Уг жүжгийн ерөнхий найруулагчаар Соёлын тэргүүний ажилтан, найруулагч М.Ариунтуяа ажиллажээ.
“Мөчрөн хуруут” хүүхэлдэйн жүжгээр хүүхэд багачуудад эелдэг харилцаа, талархал, нөхөрлөлийн үнэ цэн, байгаль дэлхийгээ хайрлан хамгаалах ухамсрыг ойлгуулах зорилготой.
Жүжгийн гол дүр болох Бадам охин өөрийн ааш зан, буруу үйлдлийн үр дагаврыг ойлгон, “Баярлалаа”, “Уучлаарай” гэх энгийн боловч хүчтэй үгсээр дамжуулан өөрчлөгдөж буй тухай өгүүлдэг бөгөөд хүүхэлдэйн дүр, тайз засал, гэрэл, хөгжмийн шийдлийг орчин үеийн өнгө төрхтэй хослуулан бүтээснээрээ онцлогтой аж.
“Мөчрөн хуруут” хүүхэлдэйн жүжгийг тавдугаар сарын 24, 28, 30, 31 болон зургаадугаар сарын 1-ний өдрүүдэд 11:00, 15:00 цагуудаас Улсын хүүхэлдэйн театрт тоглох юм. Жүжгийн тасалбар 20,000 төгрөгийн үнэтэй бөгөөд puppet.mn болон ticket.mn сайтаас авах боломжтой.
