Жүжигчин Батсуурийн Золжаргал таалал төгслөө.
Б.Золжаргал нь СУИС-ийг Ардын жүжигчин Б.Мөнхдоржийн удирдлагад төгсөж, 2013 оноос УДЭТ-т дагалдан жүжигчнээр ажлын гараагаа эхэлжээ.
Тэрбээр 2015 онд Төрийн шагналт, Ардын уран зохиолч Б.Лхагвасүрэнгийн “Үгүйлэгдсэн хайр” уянгын драмын жүжгийн гол дүр болох Отгоолойн дүрд тоглон уран бүтээлийн замналаа эхэлж, үргэлжлүүлэн Т.Габбегийн “Үнсгэлжин”, С.Жаргалсайханы “Тэмүүжин”, У.Шекспирийн “Ромео, Жульетта”, Ш.Гүрбазарын “Жаргаагүй нар”, Люсиль Флетчерийн “Уучлаарай, та дугаар андуурч”, Я.Баяраагийн “Царцаа Намжил”, К.Людвигийн “Оддын өвчин”, О.Элбэгтөгсийн “Надтай үлдээч”, Б.Мөнх-Амьдралын “Миний аав супер баатар”, Лев Толстойн “Анна Каренина”, Б.Цогнэмэхийн “Хаадын хаан: Андгай” зэрэг дэлхийн сонгодог болон үндэсний түүхэн, орчин үеийн, хүүхдийн жүжгүүдийн гол болон туслах дүрүүдийг тайзнаа бүтээсэн юм.
Б.Золжаргал 2018 онд 14 дэх удаагийн “Гэгээн Муза” олон улсын театрын наадмаас “Царцаа Намжил” жүжгийн Намжилын дүрээр шилдэг эрэгтэй гол дүр, 2023 онд 17 дахь удаагийн “Гэгээн Муза” олон улсын театрын наадмаас “Миний аав супер баатар” жүжгийн Өмхий харын дүрээр шилдэг эрэгтэй туслах дүрийн жүжигчний шагналыг тус тус хүртэж байв.
Түүнчлэн УДЭТ-т ажиллах хугацаандаа “Драм 3” хамтлагийг байгуулан дууны уран бүтээл туурвиж байсны зэрэгцээ 2015 онд “Тэрбумын хэрэг” уран сайхны киног бүтээн, үзэгчдэд хүргэж байлаа. Тэрбээр хамгийн сүүлд 2024 онд “Бараг л аймшгийн кино” уран сайхны кинонд гол дүр бүтээжээ.
