“Чингис хаан” одонт, Монгол Улсын Гавьяат жүжигчин, дуурийн дуучин Г.Ариунбаатар тавдугаар сарын 23-нд ХБНГУ-ын Берлин хот дахь “Staatsoper Unter den Linden” театрын тайзнаа Ж.Вердийн “Набукко” дуурийн гол дүр Набуккод дууллаа.
Энэ талаараа тэрбээр цахим хуудсандаа “Берлинд ирээд энэхүү гайхамшигт театрын хажуугаар өнгөрөх болгондоо “Би энэ театрт дуулах болов уу. Хэзээ бол” гэж бодож, дотроо өөртөө хэлж байсан бол энэ удаад миний мөрөөдлийн нэгээхэн хэсэг болсон театртаа дууллаа. Дуучдын хувьд “Staatsoper Unter den Linden” театрын тайзнаа дуулна гэдэг нь маш том шалгуур, нэр төрийн хэрэг байдаг билээ. Ирэх арванхоёрдугаар сард энэхүү тайзнаа дэлхийн нэрт сопрано Анна Нетребко гэх зэрэг алдартай дуучидтай хамт “Набукко” дуурьтаа дахин дуулна аа” хэмээн бичжээ.
Г.Ариунбаатарын хувьд 2026 оны эхний хагаст дэлхийн топ зэрэглэлийн дуурийн театрууд болох Францын үндэсний дуурийн театр, Мюнхений Баварын улсын дуурийн театр (Bayerische Staatsoper), Москвагийн Большой театр, Санкт-Петербургийн Мариинский театр, Италийн Женова хотын “Teatro Carlo Felice”, Испанийн Лас Пальмас хотын “Pérez Galdós” театр зэрэгт Вердийн “Трубадур”, “Бал маскарад”, “Риголетто”, “Отелло”, “Набукко”, “Симон Бокканегра” зэрэг дууриудын гол дүрийг амжилттай дуулаад байна.
