Эрт галавын махчин үлэг гүрвэл Тираннозаврын эсээс ургуулж гаргасан арьсаар урласан гар цүнхийг өчигдөр /2026.06.11/ Парис хотод дуудлага худалдаанд оруулсан ч хангалттай үнэ хүрээгүй байна.
Дуудлага худалдааны Drouot компани энэхүү “цорын ганц” бүтээлийг 500,000 ам.долларын үнэ хүргэх тооцоотой байсан ч ердөө 150,000 ам.долларын босгыг арай ядан давсан тул худалдааг цуцалжээ.
Өнгөрсөн хавар Амстердамд нээлтээ хийсэн энэ цүнхийг бүтээхдээ 25 жилийн өмнө АНУ-ын Монтана мужаас олдсон Тираннозаврын яснаас авсан коллагены үлдэгдлийг ашигласан юм байна.
“Сүүлийн жилүүдэд бид лабораторид Тираннозаврын эсээс арьс ургуулан гаргах биотехнологийг амжилттай хөгжүүлсэн” гэж дуудлага худалдааны өмнө палеонтологийн мэргэжилтэн Иакопо Бриано тайлбарлаж байжээ.
Тэрбээр энэхүү арьс нь веган савхи гэгддэг дуураймал арьснаас тэс өөр болохыг бас онцолсон юм.
“Эсийг ургуулах замаар гаргаж авсан тул энэ бол 100 хувь арьс юм. Нөгөө талаар энэ нь 67 сая жилийн өмнө устаж алга болсон амьтнаас гаралтай түүхий эд” гэж тэр хэлж байжээ.
Урьд өмнө байгаагүй ийм материалтай цүнхийг “онцгой ховор байдал”, “гаргасан хөрөнгө оруулалт”-ыг нь бодолцоод 300,000-500,000 еврогийн үнээр зарах ёстой гэж дуудлага худалдааг зохион байгуулагчид үзэж байсан юм байна.
