Монгол Улсаас БНСУ-ын Пусан хотод суугаа Консулын газар үүсэн байгуулагдсаны 10 жилийн ойн хүрээнд Монголын Үндэсний Урлагийн Их театр, Пусаны Үндэсний Урлагийн театр хамтран Пусан хотноо энэ оны есдүгээр сарын 11-12-нд бүрэн хэмжээний тоглолт тавина.
“Монголын сайхан орон” тоглолтод Монгол Улсаас МҮУИТ-ын 50 уран бүтээлч оролцох бөгөөд БНСУ-ын өмнөд бүсэд зохион байгуулж буй тус театрын анхны өргөн бүрэлдэхүүнтэй тоглолт болох юм.
Тоглолтыг Монгол Улсаас БНСУ-ын Пусан хотод суугаа Консулын газрын санаачилгаар хоёр орны соёлыг сурталчлан таниулах ажлын хүрээнд зохион байгуулж буй.
Тоглолтын хөтөлбөр олон улсад танигдсан шилдэг уран бүтээлүүдээс бүрдэнэ. Тухайлбал, БНСУ-ын үзэгчдэд зориулсан тусгай хөтөлбөрөөр шинэ өнгө, шинэлэг найруулгаар зохиомжилсноороо онцлог гэж Пусан хотод суугаа Консулын газраас мэдээлэв.
