Улсын драмын эрдмийн театр (УДЭТ) болон БНСУ-ын “Сансанмару” продакшн нар хамтын ажиллагааны санамж бичиг байгууллаа.
Талууд Монголын үзэгчдэд олон улсын түвшний, өндөр чанартай хөгжимт жүжгийн бүтээл хүргэх зорилгоор 2026–2028 оны хугацаанд УДЭТ-ын тайзнаа тоглогдох шинэ мюзиклүүдийг хамтран бүтээхээр тохиролцов.
Энэхүү хамтын ажиллагааны хүрээнд “Сансанмару” продакшны Гүйцэтгэх захирал, продюсер Ум Дун Ёл Монгол Улсад хүрэлцэн ирж, шинэ мюзикл уран бүтээлийн зохиолын хөгжүүлэлт болон төслийн бэлтгэл ажлуудад хамтран ажиллалаа.
Тэрбээр мөн БНСУ-ын тайзны урлаг, мюзиклийн өнөөгийн чиг хандлага, хөгжлийн талаар Соёл урлагийн их сургуулийн Жүжиглэх урлаг болон Хөгжимт театрын жүжигчин мэргэжлийн ангийн оюутнуудад зориулсан уулзалт, хэлэлцүүлэг зохион байгуулж, өөрийн туршлага, мэдлэгээ хуваалцав.
Ум Дун Ёл нь БНСУ-ын Тайзны урлагийн хүрээлэнгийн захирал, Солонгосын тайзны урлагийн продюсеруудын холбооны захирлаар ажилладаг бөгөөд Өмнөд Солонгосын мюзиклийн салбарын нэр хүндтэй продюсерүүдийн нэг юм.
УДЭТ болон “Сансанмару” продакшны хамтын ажиллагаа нь Монгол, Өмнөд Солонгосын тайзны урлагийн харилцааг шинэ шатанд гаргаж, олон улсын түвшний шинэ бүтээлүүдийг үзэгчдэд хүргэхэд чухал хувь нэмэр оруулах юм.
