“Арвайхээр-Талын таван эрдэнэ” нүүдлийн соёл, аман өвийн олон улсын наадам энэ сарын 19, 20-ны өдрүүдэд Арвайн талд болно.
Монголчуудын таван хошуу мал сүргээ дээдлэх аман соёлын цөм нь ерөөл, магтаал, билиг дэмбэрлийн үгс байдаг. Тиймээс наадмын хүрээнд ерөөлч, магтаалчдын уралдаан, монгол ардын аман өв “Шилдэг үлгэрч”, эх хэл, аман илэрхийллийн яаралтай хамгаалах төрөл болох “Дайралцаа”, мал маллах арга ухааныг өвлөн уламжилж буй “Шилдэг өвлөн уламжлагч” зэргийг сурталчлан түгээнэ.
“Нүүдэлчин монголчуудын оршихуйн үндэс, амин чанар болсон таван хошуу малаа дээдэлж, аль нэг мал сүргийг онцлохгүйгээр амьд таван эрдэнэ хэмээн эрхэмлэн, тэдгээртэй холбоотой өв соёл, аман уламжлалыг түгээн дэлгэрүүлэн сурталчлах шаардлага зүй ёсоор тавигдаж байна” хэмээн аймгийн СУАЖГ-ын Соёл урлагийн хэлтсийн дарга, Соёл судлалын ухааны доктор (Ph.D) Л.Пүрэвлхам хэллээ.
Наадмыг Соёл, спорт, аялал жуулчлал, залуучуудын яамны дэмжлэгээр аймгийн ЗДТГ, СУАЖЗГ-аас хамтран зохион байгуулна.
