Тулгар төрийн 2235, Их Монгол Улс байгуулагдсаны 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105 жилийн ойг тохиолдуулан Монгол Улсын Ерөнхийлөгч У.Хүрэлсүх төрийн дээд цол, одон, медаль гардууллаа.
Нийтийн биеийн тамирыг хөгжүүлэх, олимпын хөдөлгөөнийг өрнүүлэх, олимпизмын үзэл санааг түгээн дэлгэрүүлэх төр засгийн бодлого шийдвэрийг хэрэгжүүлэн, баг тамирчдаа удирдан зохион байгуулахад хөдөлмөр зүтгэлээ зориулан, улс эх орныхоо нэр хүндийг олон улсын тавцанд өндөрт өргөхөд бодит хувь нэмэр оруулж, Монгол хүний эрүүл мэндийн боловсрол, амьдралын чанарыг дээшлүүлэхэд хичээл зүтгэлээ дайчлан ажилласныг өндрөөр үнэлэн Олон улсын олимпын хорооны хүндэт гишүүн, Монголын олимпын түүх судлалын нийгэмлэгийн ерөнхийлөгч, Соёлын гавьяат зүтгэлтэн Шагдаржавын Магванг Монгол Улсын Хөдөлмөрийн баатар цол, тэмдгээр шагналаа.
