Монгол Улсын Соёлын тэргүүний ажилтан, жүжигчин, “ТВ караоке” нэвтрүүлгийн хөтлөгч Ёндонгийн Алтангэрэл таалал төгслөө.
Ё.Алтангэрэл нь Улсын багшийн дээд сургуулийн кино драмын ангийг 1989 онд төгсөж, уран бүтээлийн гараагаа найруулагч Ж.Бунтарын “Тод магнай” уран сайхны киноны туслах дүрд тоглосноор эхлүүлжээ. Тэрбээр урлагт 40 гаруй жил зүтгэж, олон сайхан дүрийг бүтээхийн сацуу 1998-2015 он хүртэл “ТВ караоке” нэвтрүүлгийг хөтөлсөн байдаг.
Тэрбээр өвчний улмаас хагас цус харваж, биеийнх нь зарим хэсэг саажсан хүнд сорилттой тулгарсан ч шантралгүйгээр өөрийгөө дайчилж, тууштай хөдөлмөр, дасгал сургуулилалтын үр дүнд эргэн хөл дээрээ босож, улмаар фитнесс, бодибилдингийн спортоор тууштай хичээллэн, Монголын бодибилдинг, фитнессийн улсын аварга шалгаруулах тэмцээнээс медаль хүртсэн бахархам амжилтыг үзүүлж байв.
