“Disney”-н 2016 оны хит хүүхэлдэйн кино “Moana”-гийн live action хувилбар буюу уран сайхны кино шүүмжлэгчдээс тааруухан үнэлгээ авч, олонх нь уг бүтээлийг “Утгагүй хувилбар, анхны хувилбарынхаа сэтгэл татам байдлыг алдагдуулсан” гэж шүүмжилжээ.
Шүүмжлэгчдийн үзэж буйгаар шинэ кино нь эх хувилбарын үйл явдлыг бараг өөрчлөлтгүй хуулбарласан бөгөөд шинэ санаа, бүтээлч шийдэл бараг агуулаагүй байна.
“Evening Standard” сонин уг бүтээлд таван одноос нэгийг өгч, “Анхны кино хөгжилтэй, сэтгэл хөдөлгөм байсан бол шинэ хувилбар нь оршин байх шаардлагагүй мэт санагдана” хэмээн бичжээ.
“The Times” сонин мөн кинонд таван одноос нэгийг өгч, Дуэйн Жонсоны бүтээсэн Мауигийн дүрийг өмнөх хүүхэлдэйн киноных шиг эрч хүчтэй биш, харин уйтгартай болсон гэж дүгнэжээ. Мөн найруулагч Томас Кэйлийн найруулга хангалттай амьд мэдрэмж төрүүлээгүй гэж шүүмжилсэн байна.
Харин гол дүрд тоглосон Австралийн залуу жүжигчин Кэтрин Лагаайягийн жүжиглэлтэд зарим шүүмжлэгч эерэг үнэлгээ өгсөн ч сул зохиол, хуучин хэв маягийг давтсан найруулга түүний авьяасыг бүрэн харуулж чадаагүй гэж онцолжээ.
“Rotten Tomatoes” сайтад нийтлэгдсэн шүүмжүүдийн дүнгээр кино шүүмжлэгчдийн үнэлгээ ердөө 33–34 хувь байгаа бол үзэгчдийн үнэлгээ харьцангуй өндөр буюу 90 хувь хүрчээ. Энэ нь шүүмжлэгчид болон үзэгчдийн байр суурь нэлээд зөрүүтэй байгааг харуулж байна.
Хэдийгээр кино Хойд Америкийн бокс оффист нээлтийн долоо хоногтоо тэргүүлсэн ч 250 сая ам.долларын үйлдвэрлэлийн өртөгтэй харьцуулахад дэлхий даяар 95 сая ам.долларын орлого олсон нь “Disney”-н хүлээлтэд хүрээгүй гэж салбарын шинжээчид үзэж байна.
