Хоёр удаагийн “Оскар”-ын шагналт жүжигчин Энтони Хопкинс 88 насандаа “Decca Classics” дуу бичлэгийн компанитай гэрээ байгуулж, хөгжмийн зохиолчийн хувиар албан ёсоор анхны синглээ гаргалаа. Ингэснээр тэрбээр олон арван жилийн турш үргэлжилсэн хөгжмийн мөрөөдлөө бодит болгож байна.
Энтони Хопкинсын анхны сингл “Bracken Road” нь түүний удахгүй гаргах “Life Is a Dream” нэртэй найрал хөгжмийн цомгийн эхний бүтээл юм. Энэхүү цомог 2026 оны наймдугаар сарын 21-нд худалдаанд гарах бөгөөд жүжигчний сүүлийн 60 гаруй жилийн хугацаанд зохиосон хөгжмийн бүтээлүүдийг багтаажээ.
Цомгийг “Philharmonia Orchestra”-ийн хөгжимчид “Грэмми”-ийн шагналт удирдаач Густаво Дудамелийн удирдлага дор тоглосон бөгөөд виолончель хөгжимчин Грегорио Нието, төгөлдөр хуурч Серхио Тьемпо нар хамтран оролцжээ.
Энтони Хопкинс “Хөгжим бол миний хамгийн анхны хүсэл мөрөөдөл байсан. Би бүх амьдралынхаа турш хөгжим зохиосон” хэмээн мэдэгдсэн байна. Тэрбээр уг цомгийн бүтээлүүд нь хүүхэд нас, гэр бүл, төрөлх Уэльс нутаг болон амьдралынх нь дурсамжаас сэдэвлэсэн маш хувийн шинж чанартай гэдгийг онцолжээ.
“Bracken Road” бүтээл нь Энтони Хопкинсын өмнөд Уэльсийн Маргам тосгонд өнгөрүүлсэн хүүхэд насны дурсамжаас санаа авсан бол цомогт багтсан “My Fatherland” зэрэг бусад зохиолууд нь түүний эх орон, гэр бүлдээ зориулсан бүтээлүүд юм.
Хэдийгээр Энтони Хопкинс дэлхий даяар “The Silence of the Lambs”, “The Father” зэрэг олон арван кинонд дүр бүтээсэн жүжигчин гэдгээрээ алдартай ч тэрбээр дөрвөн настайгаасаа төгөлдөр хуур тоглож эхэлсэн бөгөөд хөгжим нь жүжигчний карьераас ч өмнөх хамгийн анхны хүсэл тэмүүлэл байсан гэж ярьжээ.
