Говь-Алтай аймгийн Тонхил, Дарви, мөн Ховд аймгийн Цэцэг, Дарви сумын нутгийн заагт оршдог мөнх цаст Сутай хайрхан уулын тэнгэрийг тайх төрийн тахилгын ёслол Монгол Улсын Ерөнхийлөгчийн зарлигаар наймдугаар сарын 4-нд болно.
Говь-Алтай аймгийн хамгийн өндөр цэг болох далайн түвшнээс дээш 4090 метр өргөгдсөн, 60 орчим километр үргэлжилдэг байгалийн үзэсгэлэнт Сутай хайрхан уул нь тус аймгийн есөн гайхамшгийн нэг юм.
Энэ уул нь сарлагийн үржил, бэлчээрийн таатай нутаг бөгөөд сүү, саалиар арвин, сарлаг, үхрийн сүрэг олонтой тул эрт дээр үеэс “Сүүтэй уул” хэмээн нэрлэж иржээ. Сутай хайрхан нь янгир, аргаль, ирвэс, үнэг, чоно зэрэг зэрлэг амьтдын амьдрах орчин болсон, байгалийн баялаг тогтоцтой нутаг юм. Мөн уулын өвөр хормойгоос Усан зүйлийн гол эх авч урсан Тонхил нуурт цутгаж, Тонхил сумын иргэдийг ундаалдаг.
Сутай хайрханы өвөрт оршдог багахан өндөрлөг дээр эртнээс тахин шүтэж ирсэн “Их овоо” хэмээх овоо байдаг. Монгол Улсын Ерөнхийлөгчийн зарлигаар Их овоог төрийн тахилгатай болгож, 2008 онд анхны төрийн тахилгын ёслолыг үйлджээ.
2008 оноос эхлэн Их овоог тогтмол тахиж, Сутай хайрхан уулыг төрийн тахилгат уул болгон дөрвөн жил тутамд тахиж байна.
Говь-Алтай аймгийн төвөөс 300 гаруй километр, Улаанбаатар хотоос 1300 орчим километрийн зайд оршдог.
