“Godzilla vs. Kong” (2021) болон “Godzilla x Kong: The New Empire” (2024) кинонд Жиа (Jia)-гийн дүрийг бүтээж олонд танигдсан жүжигчин Кейли Хоттл 18 насандаа харамсалтайгаар таалал төгслөө. Кейли Хоттл Мэрилэнд мужийн Фредерик хотын ойролцоо гарсан автомашины ослын улмаас амиа алдсан бөгөөд тухайн үед автомашины зорчигчоор явж байжээ.
Түүний аав Жошуа Хоттл фэйсбүүкээр шууд бичлэг хийж, америкийн дохионы хэлээр (ASL) энэхүү харамсалтай мэдээг хуваалцсан байна.
Кейли Хоттл төрөлхийн сонсголын бэрхшээлтэй байсан бөгөөд Техасын Сонсголын бэрхшээлтэй хүүхдийн сургуульд суралцаж байв. Сургууль нь түүнийг дурсан эмгэнэл илэрхийлж, түүнийг авьяаслаг, бусдад урам зориг өгдөг сурагч байсан хэмээн онцолжээ.
Тэрбээр “Godzilla vs. Kong” кинонд аварга сармагчин Конгтой Америкийн дохионы хэлээр харилцдаг өнчин охин Жиагийн дүрийг бүтээсэн нь үзэгчдийн сэтгэлийг хөдөлгөж, хөгжлийн бэрхшээлтэй хүмүүсийн төлөөллийг Холливуудад илүү бодитоор харуулахад чухал хувь нэмэр оруулсан юм. Дараа нь тэрбээр энэ дүрээ “Godzilla x Kong: The New Empire” кинонд дахин бүтээж, уг дүрээрээ “Saturn Awards”-ын шилдэг залуу жүжигчин төрөлд нэр дэвшиж байжээ.
Кейли Хоттлын хамтран тоглосон жүжигчид, тэр дундаа Милли Бобби Браун, Ребекка Холл нар түүнд хүндэтгэл үзүүлж, түүнийг авьяаслаг, сайхан сэтгэлтэй нэгэн байсан хэмээн дурсан эмгэнэл илэрхийлсэн байна.
Кейли Хоттлын гэнэтийн үхэл нь кино урлагийн салбар төдийгүй сонсголын бэрхшээлтэй хүмүүсийн олон нийтэд хүнд гарз болж байна. Тэрбээр богинохон насандаа олон хүнд урам зориг өгч, өөрийн авьяас чадвараараа Холливудад мартагдашгүй мөр үлдээжээ.
