“Lego” групп Вена хотын Бельведер музейтэй хамтран Австрийн алдарт зураач Густав Климтийн “Үнсэлт” бүтээлээс сэдэвлэсэн шинэ цуглуулга гаргахаар болжээ. “ARTnews”-ийн мэдээлснээр, уг иж бүрдэл 4000 ширхэгтэй байх бөгөөд уран зурагт суурилсан “Lego”-гийн хамгийн том цуглуулга болох юм.
Шинэ бүтээгдэхүүнийг наймдугаар сарын 1-нээс худалдаанд гаргах бөгөөд худалдан авагчид цаасан заавраас гадна “Lego Builder” аппликейшнээр дамжуулан интерактив 3D заавар ашиглах боломжтой.
Уг цуглуулгад Бельведер музейн XIX–XX зууны урлагийн куратор Стефани Ауер ажилласан байна. Тэрбээр “Lego”-гийн загварын ахлах дизайнер Милан Маджтай хамтран Густав Климтийн бүтээлийн онцлог, хээ угалз, уур амьсгалыг аль болох нарийн дамжуулахыг зорьжээ.
Жинхэнэ “Үнсэлт” зураг 180×180 см хэмжээтэй дөрвөлжин хэлбэртэй бол “Lego” хувилбар 60×54 см хэмжээтэй, 4 см зузаантай байна. Угсарч дууссаны дараа бүтээлийг хананд өлгөх боломжтой бөгөөд ар талд нь хадаас эсвэл дэгээнд тогтоох тусгай бэхэлгээ хийжээ.
“Lego” өмнө нь ч алдарт урлагийн бүтээлүүдээс санаа авч цуглуулга гаргаж байсан юм. Тэдгээрийн дунд Клод Монегийн “Усан сараана”, Винсент ван Гогийн “Наранцэцэг”, Леонардо да Винчигийн “Мона Лиза”, Кацушика Хокусайн “Их давалгаа”, Роберт Индианагийн “Love” баримлаас сэдэвлэсэн загварууд багтдаг.
