Холливуудын жүжигчин Энн Хэтэуэй өөрийг нь дэлхий дахинд таниулсан “The Princess Diaries” кино нээлтээ хийснээс хойш 25 жил өнгөрснийг тохиолдуулан дурсамжтай нийтлэл хуваалцлаа. Тэрбээр өөрийн инстаграм хуудсандаа киноны зураг авалтын үеийн архивын зураг, бичлэгийг нийтэлж, дараах сэтгэгдлийг үлдээжээ.
“25 жилийн дараа ч энэ бүтээл миний амьдралд тохиолдсон хамгийн ид шидтэй зүйлсийн нэг хэвээр байна. “The Princess Diaries”-ийг надтай адил хайрлаж ирсэн бүх хүмүүст баярлалаа. Би “The Princess Diaries”-ийн гэр бүлдээ үүрд талархаж явна. Гарри, танд хайртай. Өдөр бүр таныг үгүйлдэг” гэжээ.
View this post on Instagram
Тус кино нь 2001 оны наймдугаар сарын 3-нд нээлтээ хийсэн бөгөөд тухайн үед 18 настай байсан Энн Хэтэуэйн анхны уран сайхны кино байв. Тэрбээр эгэл жирийн өсвөр насны охин хаан ширээний өв залгамжлагч болохоо мэддэг Миа Термополисын дүрийг бүтээж, энэ дүрээрээ олны танил болсон юм.
Кинонд мөн Жули Эндрюс Женовиа улсын хатан хаан Клариссийн дүрийг бүтээсэн бол найруулагчаар талийгаач Гарри Маршалл ажилласан. Энн Хэтэуэй ойн мэндчилгээнийхээ үеэр найруулагчдаа тусгайлан хүндэтгэл үзүүлж, түүнийг өдөр бүр дурсан санадгаа илэрхийлжээ.
“The Princess Diaries” нь дэлхий даяар 165 сая гаруй ам.долларын орлого олж, “Дисней”-н хамгийн амжилттай өсвөр насны инээдмийн кинонуудын нэг болсон бөгөөд Энн Хэтэуэйг Холливуудын шинэ од болгон тодруулсан бүтээлд тооцогддог. Үүний дараа 2004 онд “The Princess Diaries 2: Royal Engagement” кино гарсан бөгөөд одоо гуравдугаар анги нь хөгжүүлэлтийн шатандаа явж байгаа юм.
