2001 онд нээлтээ хийсэн “The Fast and the Furious” киноноос хойш эл цувралд Доминик “Дом” Тореттогийн дүрийг бүтээж буй 59 настай жүжигчин Вин Дизел удахгүй гарах цувралын сүүлчийн анги болох “Fast Forever” киноны зохиолыг уншаад уйлсан тухайгаа хуваалцжээ.
Тэрбээр “Би Майкл Лесслигийн бичсэн “Fast Forever” киноны зохиолыг саяхан уншлаа. Энэ бол сүүлийн хэдэн арван жилд уншсан хамгийн шилдэг зохиол. Би одоо ч уйлсаар байна” хэмээн наймдугаар сарын 1-нд инстаграм хуудсандаа бичсэн байна.
2001 онд нээлтээ хийсэн “The Fast and the Furious” кинонд Вин Дизелээс гадна 2013 онд 40 насандаа харамсалтайгаар нас барсан Пол Уокер, Мишель Родригес, Жордана Брюстер, Рик Юн, Чад Линдберг нар тоглосон юм.
Өнгөрсөн хорь гаруй жилийн хугацаанд “Fast & Furious” франчайз 10 үндсэн кино, “Fast & Furious Presents: Hobbs & Shaw” спин-офф киног гаргаад байна. Мөн Тайриз Гибсон, Лудакрис, Натали Эммануэль, Сон Кан, Жейсон Стэйтем, Шарлиз Терон, Жон Сина зэрэг олон алдартай жүжигчид цувралд нэгджээ.
2028 оны гуравдугаар сарын 17-нд дэлхий даяар нээлтээ хийх “Fast Forever” кинонд 2023 онд гарсан “Fast X” киноны үйл явдлыг үргэлжлүүлэх юм. Киног “Fast X” киног найруулсан Луи Летеррье найруулах бол зохиолыг “The Hunger Games: The Ballad of Songbirds and Snakes”, “Macbeth”, “Assassin’s Creed”, мөн удахгүй гарах “Sunrise on the Reaping” бүтээлүүдээрээ танигдсан Майкл Лессли бичжээ.
