Увс аймгийн 101 жилийн ойн хүрээнд дөрвөдийн Төгсхүлэг Далай ханы хошууны нэрт туульч, Жангар хайлагч Цагаадайн Цэдэвийн (1904–1983) аж амьдрал, уран бүтээлийн тухай ховор гэрэл зургуудыг олон нийтэд дэлгэн сурталчилж байна.
Цагаадайн Цэдэв нь одоогийн Увс аймгийн Бөхмөрөн сумын харьяат бөгөөд икэл хуур татаж Жангар тууль, Алтайн магтаал хайлдаг, хуучны үлгэр, домог арвин мэддэг, тууль өвлөн уламжлагчдын нэг байжээ.
Тэрээр насан эцэслэх хүртлээ эсгий гэрт амьдарч, ил тулганд гал түлэн, нэхий дээл, монгол гутал, юүдэн малгайгаа өмсөж явсан уламжлалт ахуйгаа хадгалан үлдээсэн нь өнөөдөр түүхэн гэрэл зургуудаар дамжин мөнхөрсөн байна.
Мөн түүний төрсөн дүү Цагаадайн Зодов нь Дөрвөдийн Төгсхүлэг Далай ханы хошууны алдартай туульчдын нэг байсан бөгөөд ах дүү хоёр нутгийнхаа аман зохиол, Жангар туулийг хойч үедээ өвлүүлэн уламжлуулахад үнэтэй хувь нэмэр оруулжээ.
Увс аймгийн музейн хамт олон аймгийн 101 жилийн ойн хүрээнд сан хөмрөгтөө хадгалж буй түүхэн гэрэл зургуудыг албан ёсны цахим хуудсаараа дамжуулан олон нийтэд цувралаар сурталчилж байгаа бөгөөд энэ удаад нэрт туульч Цагаадайн Цэдэвийн амьдрал, уран бүтээлийг харуулсан ховор зургуудыг ийнхүү онцолжээ.
Хуучны гэрэл зургууд нь тухайн цаг үеийн хүмүүсийн ахуй соёл, хувцас хэрэглээ, уламжлалт амьдралын хэв маяг, түүхэн агшныг бодитоор өгүүлдгээрээ соёлын өвийн үнэт эх сурвалж болдог.
