Рок хөгжмийн домог болсон дуучин Жоан Жетт нурууны гэмтлийн улмаас хагалгаанд орсон тул ирэх есдүгээр сард хийхээр төлөвлөж байсан хоёр тоглолтоо цуцалжээ.
Өдгөө 67 настай Жоан Жеттийн багийн мэдээлснээр тэрбээр саяхан гэмтэл авч, улмаар нугаламын яс хугарсан байна. Тиймээс эмч нарын зөвлөсний дагуу ортопедийн хагалгаанд оржээ.
Түүний багийн мэдэгдэлд Жетт одоо физик эмчилгээ хийлгэж, биеэ бүрэн сэргээхэд анхаарна гэжээ. Мөн тэрбээр шүтэн бишрэгчдээ гонсойлгосондоо харамсаж байгаа ч цаашдаа олон жилийн турш гайхалтай тоглолтуудаа үргэлжлүүлэн хийхийг хүсэж байгаагаа илэрхийлсэн байна.
Жоан Жетт болон “The Blackhearts” хамтлаг өнгөрсөн сард 16 жилийн дараах анхны Их Британийн аялан тоглолтоо дуусгасан юм. Жоан Жетт нь “I Love Rock ’n Roll”, “Bad Reputation” зэрэг рок хөгжмийн алдартай хит дуугаараа дэлхий даяар танигдсан уран бүтээлч билээ.
