“Good Will Hunting”, “Argo”, “Gone Girl”, “The Town” зэрэг бүтээлээрээ олон улсад танигдаж, мөн DC-ийн ертөнцөд Брюс Уэйн буюу Бэтмэний дүрийг бүтээснээрээ шинэ үеийн үзэгчдийн дунд нэр хүндтэй болсон жүжигчин, кино зохиолч, найруулагч, продюсер Бен Аффлек өнөөдөр 54 нас хүрч байна.
Бенжамин Геза Аффлек 1972 оны наймдугаар сарын 15-нд АНУ-ын Калифорни мужийн Беркли хотод төржээ. Гэвч тэрбээр Массачусетс мужид өсөж, бага наснаасаа жүжиглэх урлагт сонирхолтой болсон байна. Түүний дүү нь мөн “Оскар”-ын шагналт жүжигчин Кейси Аффлек юм.
Аффлек хүүхэд байхаасаа телевизийн бүтээлүүдэд тоглож эхэлсэн бөгөөд 1980-аад онд PBS-ийн боловсролын “The Voyage of the Mimi” цувралд оролцсон нь түүний мэргэжлийн замналын эхлэл болсон байна.
1990-ээд оны эхээр тэрбээр “School Ties”, “Dazed and Confused” зэрэг кинонд тоглож, киноны ертөнцөд өөрийгөө таниулж эхэлжээ. Тухайн үед тэрбээр найруулагч Кевин Смитийн хэд хэдэн бүтээлд тоглосон нь түүний жүжигчний карьерын чухал хэсэг болсон юм.
Бен Аффлек болон түүний багын найз, жүжигчин Мэтт Дэймон хоёрын нөхөрлөл Холливуудад маш алдартай. Тэд хамтран “Good Will Hunting” киноны зохиолыг бичиж, 1997 онд уг бүтээлийг дэлгэцэнд гаргасан. Мэтт Дэймон гол дүрд тоглож, Бен Аффлек мөн жүжигчний бүрэлдэхүүнд багтсан бөгөөд кинонд Робин Уильямс, Минни Драйвер зэрэг жүжигчид тоглосон юм.
“Good Will Hunting” кино шүүмжлэгчид болон үзэгчдээс өндөр үнэлгээ авч, Аффлек, Дэймон хоёр шилдэг эх зохиол номинациар “Оскар”-ын шагнал хүртсэн. Тухайн үед 25 настай байсан Бен Аффлек энэ төрөлд “Оскар” хүртсэн хамгийн залуу зохиолч болсон юм. Энэхүү амжилт түүнийг Холливуудын хамгийн ирээдүйтэй залуу уран бүтээлчдийн нэг болгож, томоохон студийн кинонуудын санал авах замыг нээжээ.
“Good Will Hunting”-ийн дараа Бен Аффлекийн карьер эрчимтэй өсөж, 1998 онд “Armageddon” кинонд Брюс Уиллис, Лив Тайлер нарын хамт тоглосон. Тус кино дэлхийн хэмжээнд томоохон амжилт үзүүлж, Бен Аффлекийг блокбастер киноны гол дүрийн жүжигчин болгожээ.
Тэрбээр мөн “Shakespeare in Love”, “Pearl Harbor”, “The Sum of All Fears”, “Changing Lanes” зэрэг олон төрлийн кинонд тоглож, романтик драм, тулаант кино, түүхэн бүтээл зэрэг өөр өөр жанраар өөрийгөө сорьсон байна.
Гэвч 2000-аад оны эхээр түүний карьер тодорхой хэмжээгээр уналтад орсон. “Daredevil”, “Gigli” зэрэг бүтээлүүд шүүмжлэгчдээс тааруу үнэлгээ авч, хэвлэл мэдээллийн анхаарал түүний уран бүтээлээс илүү хувийн амьдрал руу нь чиглэх болсон үе ч бий.
Бен Аффлек жүжигчний карьераа үргэлжлүүлэхийн зэрэгцээ найруулагчийн замыг сонгосон нь түүний уран бүтээлийн шинэ үеийг эхлүүлсэн юм.
2007 онд тэрбээр “Gone Baby Gone” киногоор найруулагчийн анхны бүтээлээ хийсэн. Үүний дараа 2010 онд “The Town”, 2012 онд “Argo” зэрэг кинонуудыг найруулжээ.
Ялангуяа “Argo” түүний карьерын хамгийн том амжилтуудын нэг болсон. 2012 онд нээлтээ хийсэн уг кинонд Бен Аффлек найруулагч, продюсер, гол дүрийн жүжигчний үүргийг зэрэг гүйцэтгэсэн. Кино нь олон улсын нэр хүндтэй шагналуудыг хүртэж, 2013 онд “Оскар”-ын шилдэг кино шагналыг авсан юм. Мөн Бен Аффлек найруулагчийн ажлаараа “Алтан бөмбөрцөг”, BAFTA болон “Directors Guild Award” зэрэг шагнал хүртжээ.
Ийнхүү өмнө нь зөвхөн жүжигчин гэдгээрээ танигдаж байсан Бен Аффлек өөрийгөө кино бүтээлийн ард ажилладаг хүчтэй уран бүтээлч гэдгээ баталсан байна.
2016 онд Бен Аффлек “Batman v Superman: Dawn of Justice” кинонд Брюс Уэйн / Бэтмэний дүрийг бүтээж, комиксийн супер баатрын ертөнцөд хөл тавьсан.
Тэрбээр дараа нь “Justice League” болон DC-ийн бусад бүтээлүүдэд Бэтмэний дүрээр эргэн ирсэн. Энэ дүр нь Бен Аффлекийн карьерын хамгийн их яригдсан дүрүүдийн нэг болж, түүний жүжигчний цар хүрээг дахин харуулсан юм.
Бен Аффлек 2014 онд Дэвид Финчерийн найруулсан “Gone Girl” кинонд гол дүрд тоглож, жүжигчний хувьд дахин өндөр үнэлгээ авчээ. Дараа нь “The Accountant”, “The Way Back” зэрэг кинонд тоглосон.
2023 онд тэрээр спортын түүхээс сэдэвлэсэн “Air” кинонд тоглож, мөн найруулагчаар ажилласан. Түүний найруулагчийн дараагийн бүтээлүүдийн нэг болох “Animals” мөн 2026 онд “Netflix”-ээр гарахаар төлөвлөгдсөн байна.
Мөн Аффлек, Мэтт Дэймон нарын олон жилийн нөхөрлөл, уран бүтээлийн хамтрал үргэлжилж, 2026 онд “The Rip” кинонд дахин хамтран ажилласан нь тэдний нөхөрлөлийн түүхийг шинэ бүтээлээр үргэлжлүүлсэн үйл явдал болсон юм.
Өнөөдөр Бен Аффлек нь Холливуудын зөвхөн алдартай жүжигчдийн нэг биш, кино зохиол бичихээс эхлээд найруулга, продюсерын ажил хүртэл бүтээлийн бүхий л үе шатанд оролцож чаддаг уран бүтээлчдийн нэг гэж үнэлэгддэг. Түүний карьер амжилт, уналт, дахин сэргэлтээр дүүрэн байсан ч “Good Will Hunting”-ийн залуу зохиолчоос “Argo”-гийн “Оскар”-ын шагналт найруулагч хүртэлх замнал нь Холливуудын хамгийн сонирхолтой карьеруудын нэг хэвээр байна.
