“Нүүдэлчин соёлын фестиваль-2026” наадамд Алтай нутгийн өв соёлын дээж “Агийн улаан хаан” баатарлаг туулийг хайлна.
Жил бүр уламжлал болон зохион байгуулдаг ил наадамд түүх, соёл, аман өв, ёс заншил, нүүдэлчин ахуйн ухаан, баатарлаг туульсын цуурайг тээсэн Говь-Алтай аймгийн язгуур урлагийн 35 хүний бүрэлдэхүүнтэй баг оролцох аж.
Ингэхдээ тэд говь, хангай хосолсон Алтай нутгийн өв соёлын дээжийг таниулан сурталчлахаар төлөвлөсөн тухай Говь-Алтай аймгийн СУАЖЗГ-аас мэдээллээ. Тухайлбал, “Агийн улаан хаан” баатарлаг туулийг хайлж баруун Алтайн өв соёл, эртний туульсын сүр хүчийг эгшиглүүлэхээрээ онцлогтой аж.
Мөн нүүдэлчдийн ерөөл магтаал, “Идэр жинчин” уртын дуу, “Үзүүр зуслантай Алтай” дуу, Говь-Алтай аймгийн магтаал гэх мэт урлагийн бүтээлийг толилуулах тухай нэмж мэдээлэв.
Үүний зэрэгцээ баруун Алтай нутгийн уламжлалт ёс заншил, түүх, соёлын үл хөдлөх дурсгалын өвийн эмхтгэл бүтээл, байгаль цаг уурыг шинжин таних уламжлалт ухаан, гал тахих ёс зан үйлээ өргөн толилуулахаар төлөвлөжээ.
Эртний туульсын сүр хүч, уртын дууны уянга, ерөөл магтаалын бэлгэдэл, өвгөдийн ухаан шингэсэн ёс заншил бүхэн Алтайн ард түмний түүх, оюун санаа, нүүдэлчин ахуйн амьд өвийг “Нүүдэлчин соёлын фестиваль-2026”-аар таниулан сурталчлах юм.
Монгол Улсын соёлын биет бус өвийн олон төрөл зүйл, угсаатны бүлгүүдийн өвөрмөц өв соёлыг дэлхийд таниулан сурталчлах уг наадам наймдугаар сарын 21-23-ны өдрүүдэд болох ажээ.
