Пикассогийн гарын үсэгтэй, ердөө 30 хувь нь мэдэгдэж буй “Torero” бүтээл 2018 онд Билл ДеЛиндын галерейгаас хулгайд алдагдсан байжээ.
Билл ДеЛинд 2018 онд Милуоки дахь галерейгаасаа хулгайд алдсан Пабло Пикассогийн эл бүтээлийг хэзээ ч эргэж олдохгүй гэж бодож байв. Гэтэл өнгөрсөн долоо хоногт цагдаа түүн рүү утасдаж, орон сууц цэвэрлэж байсан нутгийн байрны эзэн нэгэн урлагийн бүтээл олсон тул үзэж таних эсэхийг нь асуужээ.
Билл ДеЛинд уг бүтээлийг шууд таньсан байна. Энэ нь Пикассогийн гарын үсэгтэй, дэлхий даяар ердөө 30 хувь нь мэдэгдэж буй “Torero” нэртэй хэвлэмэл бүтээл байжээ. Тэрбээр “Үнэхээр их сэтгэл хөдөлсөн. Юу хэлэхээ ч мэдэхгүй байсан. Маш их догдолсон мөч байлаа” хэмээн баасан гараг /2026.08.14/-т ярьжээ.
Бүтээлийн хүрээний ар талд Билл ДеЛиндын “DeLind Fine Art Appraisals” галерейн наалт тэр хэвээрээ байв. Тус наалтыг 2018 онд уг бүтээлийг галерейд байх үед нь наасан аж. Үүнийг харсан Билл ДеЛинд “Энэ үнэхээр миний бүтээл мөн байсан. Эцэст нь эргээд над дээр ирлээ” гэсэн байна.
Милуокигийн байрны эзэн Тим Дерц WISN-TV-д ярилцлага өгөхдөө уг бүтээлийг түрээслэгчийг байрнаас нь гаргасны дараа орон сууцыг цэвэрлэж байхдаа олсон гэжээ. Тэрбээр уг зургийг хананд өлгөсөн, бага зэрэг хачирхалтай газар байсан бөгөөд дээр нь маш их тоос хуримтлагдсан тул удаан хугацаанд тэнд байсан бололтой гэж ярьсан байна.
Тим Дерц уг бүтээлийг эртний эдлэлийн худалдаа эрхэлдэг найздаа үзүүлэхэд найз нь Пикассогийн бүтээл болохыг таньж, 2018 онд Билл ДеЛиндын галерейгаас хулгайлагдсан бүтээл мөн байж болзошгүйг хэлжээ. Үүний дараа Тим Дерц бүтээлийг цагдаад хүлээлгэн өгсөн бөгөөд цагдаа нар Билл ДеЛиндтэй холбоо барьсан байна.
Ийнхүү найман жилийн өмнө алга болсон Пикассогийн ховор бүтээл санаанд оромгүй байдлаар эзэндээ эргэн ирсэн байна.
