Италийн Сицили арал дахь Мессина хотын Орон нутгийн музейгээс зураач Антонелло да Мессинагийн бүтээл болох дөрвөн ширхэг зураг алдагджээ.
Бямба гаргийн орой тус музейд нэвтэрсэн этгээдүүд уран зургууд бүхий дөрвөн модон самбарыг хулгайлсан бөгөөд эдгээр нь Сан Грегориогийн гурван полиптих зураг, мөн бурхны эх Мариа ба Христийг дүрсэлсэн хоёр талт зураг юм. Полиптих гэдэг нь хоёр болон түүнээс дээш хэсгээс (самбар) бүрдэх, хоорондоо холбогдсон уран зураг юм. Ихэнхдээ нугасаар холбогдон эвхэгддэг.
Хэргийн газарт уран зургийн мэргэжилтнүүд ажиллаж байгаа бөгөөд хулгайч нар полиптих зургуудыг бүгдийг нь авч амжаагүй байна. Уг зургийг орон нутгийн сүмд зориулан бүтээсэн бөгөөд 1908 оны газар хөдлөлтийн үеэр ноцтой гэмтсэн тул хэд хэдэн удаа сэргээн засварлажээ.
Нэг талдаа бяцхан хүүхдийг тэвэрсэн Мадонна, нөгөө талдаа Христийг дүрсэлсэн нугастай модон самбарыг Лондоны Christie’s ордны дуудлага худалдаагаар худалдан авсан байна.
Антонелло да Мессина (1429-1479) бол эрт үеийн Сэргээн мандалтын эриний Сицилийн алдартай зураач юм. Түүний бүтээлүүд олон жилийн турш Сицили арал дээр байсан бөгөөд 21 дүгээр зуун гарснаас хойш үзэсгэлэнд тавих болжээ. Өдгөө да Мессинагийн нийтдээ 40 орчим бүтээл хадгалагдаж байна.
Саяхан “Өргөст титэм өмссөн Христ” (Ессе Homo) гэдэг зургийг нь Sotheby’s ордны дуудлага худалдааны үеэр 12 сая доллароор заржээ.
